Almatyda jóndeý kezinde alynǵan granıt plıtalar qaıta ornyna qoıylmaıdy — ákimdik túsiniktemesi

ALMATY. KAZINFORM — Úlken Almaty ózeniniń jaǵalaýynda jóndeý jumystary júrip jatyr. 

Aýmaqty jańǵyrtý jobasy aıasynda ózen jaǵalaýyndaǵy granıt plıtalar alynǵan. Áleýmettik jeli qoldanýshysy buryn berik qurylym bolǵan oryndarda qazir beton quıylyp, plıtalardyń qaıta qoıylmaýyna shaǵym bildirdi. Aıtýynsha, onyń ornyna betonnyń joǵary jaǵy granıt túsine boıalǵan.

Almaty qalasynyń ákimdigi bul jaǵdaıǵa baılanysty túsinikteme berdi. Resmı jaýapqa sáıkes, tehnıkalyq-ekonomıkalyq baǵalaý nátıjesi boıynsha granıtti paıdalýdan bas tartý týraly sheshim qabyldanǵan.

— Óıtkeni ol — kúrdeli kútimdi jáne keıinnen turaqty restavratsııany talap etetin, shyǵyny joǵary materıal. Onyń ornyna qorǵanysh jabyny bar beton qoldanylyp jatyr, — dep habarlady ákimdikten.

Sondaı-aq beton jabyny úshin ylǵal jaǵdaıda paıdalanýǵa arnalǵan boıaý qoldanylatyny habarlandy. Mundaı jabyn nysannyń uzaq merzimge jaramdy bolýyna, sýǵa jáne temperatýra ózgerisine tózimdiligin qamtamasyz etpek, sondaı-aq onyń syrtqy kelbetin jaqsartady.

— Mundaı tehnologııa birqatar ınjenerlik gıdrotehnıkalyq nysandarda qoldanylady jáne qoldanystaǵy qurylys normalaryna sáıkes keledi, — dep túsindirdi ákimdikten.

Eske salaıyq, buǵan deıin Úlken Almaty ózeni jaǵalaýynda granıt plıtalardy urlaý deregi boıynsha qylmystyq is qozǵaldy.

Sondaı-aq Almaty ákimdigi nysandaǵy granıt plıtalar men jıektastar daýyna baılanysty túsinikteme berdi.