Almaty – Dýbaı júk reısteri aptasyna bir ret oryndalady
ASTANA. KAZINFORM — Flydubai Almaty men Dýbaı arasynda júk reısterin oryndaı bastady.
Almaty halyqaralyq áýejaıy flydubai áýe kompanııasynyń Dýbaı – Almaty – Dýbaı baǵyty boıynsha alǵashqy júk reısin qarsy aldy. Jańa júk baǵytynyń ashylýyna oraı saltanatty rásim uıymdastyrylyp, áýe kemesi avıatsııadaǵy dástúrli sý arkasymen qarsy alyndy.
Atalǵan baǵyt boıynsha júk reısteri Boeing737 áýe kemelerimen aptasyna bir ret oryndalady.
Jańa baǵyt Ortalyq Azııa men Taıaý Shyǵystyń mańyzdy kólik-logıstıkalyq ortalyqtary sanalatyn Almaty men Dýbaı arasynda tikeleı júk áýe qatynasyn qamtamasyz etedi. Bul baǵyttaǵy turaqty reıster eksporttyq-ımporttyq tasymaldardy damytýǵa, logıstıkalyq yntymaqtastyqty keńeıtýge jáne saýda-ekonomıkalyq baılanystardy nyǵaıtýǵa qosymsha múmkindikter ashady.
Almaty halyqaralyq áýejaıy álemniń negizgi logıstıkalyq ortalyqtarymen júk áýe qatynasyn damytýdy jalǵastyryp, júk tasymalynyń múmkindikterin keńeıtýge jáne Almatynyń Ortalyq Azııadaǵy avıatsııalyq-logıstıkalyq ortalyq retindegi pozıtsııasyn nyǵaıtýǵa baǵyttalǵan jumystardy júrgizýde.
