Almaty dárigerleri salmaǵy 730 gramm bolyp týǵan sábıdi aman alyp qaldy

ALMATY. KAZINFORM – Almatynyń №2 qalalyq perınataldyq ortalyǵynda dárigerler júktiliktiń 27-aptasynda dúnıege kelgen shala týǵan qyz balany aman alyp qaldy. 

Almaty qoǵamdyq densaýlyq saqtaý basqarmasynyń habarlaýynsha, áıel amnıotıkalyq suıyqtyqtyń merziminen buryn aǵýyna baılanysty ortalyqqa shuǵyl túrde jetkizilgen. Ýltradybystyq zertteý nátıjesinde mamandar ishtegi náresteniń ómirine qaýip tónip turǵanyn anyqtap, shuǵyl ota jasaý týraly sheshim qabyldady.

Kesar tiligin ortalyq dırektory bastaǵan dárigerler toby jasaǵan, nátıjesinde salmaǵy nebári 730 gramm bolatyn qyz bala dúnıege keldi. Náreste ómiriniń alǵashqy sátinen bastap jańa týǵan balalardyń jansaqtaý jáne qarqyndy terapııa bóliminde boldy. 28 kún boıy dárigerler men medbıkeler onyń jaǵdaıy úshin kúresti.

Jaǵdaıy turaqtanǵan soń sábı kútimniń ekinshi kezeńine – jańa týǵan náresteler patologııasy bólimine aýystyryldy. Otbasy ortalyqta 56 kún boldy. Osy ýaqyt ishinde balanyń salmaǵy eki eseden astam artyp, 1 800 grammǵa jetti.

Aıta keteıik, Almaty qalasynyń №2 qalalyq perınataldyq ortalyǵyndaǵy balalar reanımatsııasy bólimshesinde salmaǵy óte tómen bolyp týǵan, sondaı-aq táýlik boıy qarqyndy terapııany qajet etetin aýyr háldegi jańa týǵan nárestelerge medıtsınalyq kómek kórsetiledi.

Eske salaıyq, buǵan deıin Almatyda Balalarǵa shuǵyl medıtsınalyq kómek kórsetý ortalyǵynyń bazasynda jańa týǵan nárestelerdi jansaqtaý jaǵdaıynda kútip-baptaýǵa arnalǵan mamandandyrylǵan neonatologııa bólimshesi ashylǵanyn habarlaǵan edik.