Almaty dárigerleri salmaǵy 1000 gramnan tómen 43 sábıdiń ómirin saqtap qaldy
ALMATY. KAZINFORM — Almaty qalalyq № 2 perınataldyq ortalyǵynda dárigerler salmaǵy bar bolǵany 742 gramm bolyp dúnıege kelgen sábıdiń ómirin saqtap qaldy.
Qoǵamdyq densaýlyq saqtaý basqarmasynyń málimetinshe, bala 2025 jyldyń 30 tamyzynda, júktiliktiń 26-aptasynda dúnıege kelgen. Týǵannan keıin onyń jaǵdaıy asa aýyr bolǵan.
— 40 kún boıy sábı ókpeni jasandy jeldetý apparatynda boldy, keıin 24 kún nazaldy SIPAP-terapııada, sońǵy 10 kún ózdiginen dem alyp jatyr. Qazir sábıge 74 kún boldy, ol qurylǵysyz ózdiginen tynystap jatyr. Árbir gramm, árbir tynys dárigerlerdiń ortaq eńbegi men sábıdiń ómirge degen jigeriniń nátıjesi. Bul biz úshin jaı ǵana medıtsınalyq jumys emes, kún saıynǵy ómir úshin kúres, — dedi № 2 perınataldyq ortalyq dırektorynyń orynbasary Aınurym Sarbas.
Ortalyq dárigerleri jyl basynan beri salmaǵy 1000 gramnan tómen týǵan 43 sábı ómirin saqtap qalǵan
Eske salaıyq, buǵan deıin Almatyda qala kúninde úshem dúnıege kelgenin jazǵanbyz.