Almaty dárigerleri «Qan tapsyryp, ómir syıla» naýqanynda 37 lıtr qan tapsyrdy
ALMATY. KAZINFORM – Almatydaǵy Pedıatrııa jáne balalar hırýrgııasy ǵylymı ortalyǵynyń mamandary «Qan tapsyryp, ómir syıla» naýqany aıasynda Respýblıkalyq qan ortalyǵyna eki kúnde 37 lıtr qan tapsyrdy.
Saýapty is-sharaǵa dárigerlerden bastap meıirgerlerge deıin úles qosty. Sonymen qatar, ákimshilik qyzmetkerleri de qatysty. Barlyǵy 83 maman erikti túrde qan tapsyrǵan.
«Turaqty túrde qan tapsyryp júrgenime 5-6 jyl boldy. Qan tapsyrýdaǵy maqsatym – qaterli dertke shaldyqqan kishkentaı búldirshinderge kómektesý. Eń bastysy – qan quıýǵa muqtaj jandarǵa kómegim tıse bolǵany. Osynda ózimniń bir adamǵa bolsyn septigimdi tıgizýge kelip otyrmyn», - deıdi dáriger D.Álipbaev.
Aıta ketken jón, elimizde jasy 18-den asqan, medıtsınalyq kórsetkishi jaqsy kez kelgen azamat donor bola alady. Erler jylyna 6 ret, áıelder 4 ret qan tapsyrýǵa múmkindigi bar.
Eske salaıyq, buǵan deıin almatylyqtar qaıda baryp qan donory bola alatynyn jazǵanbyz.