Almaty dárigerleri baýyry zaqymdanǵan júkti áıeldi aman alyp qaldy

QONAEV. KAZINFORM – Almaty oblystyq akýsherlik gınekologııa jáne perınatologııa ortalyǵynyń dárigerleri aýyr jaǵdaıda túsken júkti áıelge shuǵyl kesar tiligin jasap, ana men náresteni aman alyp qaldy.

Aýrýhanaǵa júktiliktiń 32 aptasynda HELLP sındromymen, jedel baýyr jetkiliksizdigimen jáne astsıtpen (ish qýysynda suıyqtyqtyń jınalýy) asqynǵan aýyr preeklampsııa dıagnozymen aýyr jaǵdaıda túsken 42 jastaǵy áıelge shuǵyl kesar tiligi operatsııasy jasaldy.

– Mundaı jaǵdaıda áreket etý talaby boıynsha birneshe sala mamany birlese áreket etip, shuǵyl otany tórt márte jasady. Naýqasta kóptegen asqynýlar boldy, sepsıs, organdardyń durys jumys istemeýi naýqastyń jalpy jaǵdaıynyń aýyrlaýyna ákeldi. Operatsııa kezinde tolyq hırýrgııalyq gemostaz jáne ishki myqyn arterııalaryn baılaý júrgizildi, biraq naýqastyń jaǵdaıy alańdaýshylyq týǵyzdy, – deıdi oblystyq aýrýhananyń akýsherlik gınekologııa jáne perınatologııa ortalyǵynyń dırektory Gúljahan Jumadýllaeva.

Aıtýynsha, operatsııadan keıin úshinshi kúni akýsherlik, reanımatologııa jáne gepatologııa salasyndaǵy sarapshylardyń qatysýymen telemedıtsınalyq keńes júrgizildi.

– Qıyndyqtarǵa qaramastan, dárigerler zamanaýı tásilderdi qoldana otyryp, ana men balanyń ómirin qutqaryp qaldy. Qazir naýqastyń jaǵdaıy jaqsaryp, úıine otbasyna aman-esen oraldy, – dep tolyqtyrdy Almaty oblysy densaýlyq saqtaý basqarmasy basshysynyń orynbasary Leıla Serikbaeva.

Osyǵan deıin Almaty qalasynyń № 2 qalalyq perınataldy ortalyǵynyń dárigerleri shala týǵan balany aman alyp qalǵan bolatyn.