Almaty dárigerleri 33 jastaǵy jigittiń kózin saqtap qaldy
ASTANA. KAZINFORM — Almatyda dárigerler IV dárejeli keratokonýs dıagnozy qoıylǵan 33 jastaǵy patsıenttiń kózin saqtap qaldy. Naýqasqa bes aı buryn móldir qabyq transplantatsııasy jasalǵan. Bul týraly Densaýlyq saqtaý mınıstrligi málim etti.
Búgin 33 jastaǵy patsıent kúrdeli operatsııadan keıin bes aı ótken soń Almaty qalalyq ortalyq klınıkalyq aýrýhanasyna qaıta keldi. Bes aı buryn oǵan IV dárejeli aýyr keratokonýs dıagnozyna baılanysty móldir qabyqty transplantattaý jasalǵan bolatyn. Búgingi baqylaý tekserýi jaqsy nátıjeni kórsetti. Patsıent dárigerge alǵys aıtý úshin de arnaıy kelgen.
33 jastaǵy jas jigit ıóldir qabyqtyń aýyr aýrýy — IV dárejeli keratokonýsqa tap bolǵan. Aýrýdyń údeýine baılanysty kórý qabileti aıtarlyqtaı tómendep, móldir qabyqty transplantattaý qajet bolǵan.
Operatsııany Almaty qalalyq ortalyq klınıkalyq aýrýhanasynyń oftalmologııa bólimshesiniń meńgerýshisi Gúlzat Abdraımova jasady. Hırýrgııalyq emniń arqasynda patsıenttiń kózi saqtalyp qaldy.
Búgin, transplantattaýdan keıin bes aı ótken soń, mamandar baqylaý tekserýin júrgizdi. Móldir qabyqtyń jaǵdaıy oń baǵalanyp otyr.
Tekserýden keıin jas patsıent kórsetilgen em men kómek úshin dárigerge jáne medıtsına qyzmetkerleri tobyna shynaıy alǵysyn bildirdi.
— Biz úshin ár operatsııanyń artynda naqty adamnyń taǵdyry tur. Ásirese jas patsıentterge kórý qabiletin saqtap, tolyqqandy ómir súrýine, bilim alýyna, eńbek etýine jáne bolashaqqa jospar qurýyna múmkindik berý asa mańyzdy, — deıdi oftalmologııa bólimshesiniń meńgerýshisi Gúlzat Abdraımova.
Móldir qabyqty transplantattaý — oftalmohırýrgııadaǵy kúrdeli baǵyttardyń biri. Ol mamandardyń joǵary biliktiligin, zamanaýı hırýrgııalyq tehnologııalardy jáne operatsııadan keıin uzaq ýaqyt boıy baqylaýdy qajet etedi.
Almaty qalalyq ortalyq klınıkalyq aýrýhanasynda mundaı operatsııalar donorlyq baǵdarlama sheńberinde júrgiziledi.
Jyl basynan beri aýrýhana mamandary 15 móldir qabyqty transplantattaý jasady.
Ár operatsııanyń artynda jeke tarıh jáne transplantattaý kórý qabiletin saqtap qalýǵa nemese qaıta qalpyna keltirýge múmkindik bergen adam tur.
Aıta keteıik, buǵan deıin Qazaqstanda donorlyq aǵzaǵa muqtaj 4 739 adam transplantatsııa kezeginde turǵanyn jazdyq. Onyń 125-i – balalar. Elde transplantatsııa júıesi birtindep damyp kele jatqanymen, máıittik donorlyqtyń úlesi áli de tómen. Sondyqtan kóptegen patsıent aǵzany birneshe jyl kútýge májbúr.
