Almaty bıýdjetinen únemdelgen qarjy áleýmettik salaǵa jumsalady

Qalalyq máslıhattyń kezekten tys XI sessııasynda depýtattar Almatynyń 2023 jylǵa arnalǵan naqtylanǵan bıýdjetin bekitti. Únemdelgen 24 mlrd teńge áleýmettik salaǵa jumsalatyn boldy, dep habarlaıdy Kazinform. 

Qala máslıhatynan málim etkendeı, kún tártibindegi negizgi máselelerdiń biri — Almaty qalasynyń 2023-2025 jyldarǵa arnalǵan bıýdjetine ózgerister engizý boldy.

«Bıyl únemdelgen 24 mlrd teńge kólemindegi qarajatty áleýmettik mańyzdy jobalar men is-sharalarǵa baǵyttaý týraly sheshim qabyldandy. Qarajat bıýdjettik baǵdarlamalar ákimshileri arasynda qarajatty qaıta bólý jáne memlekettik satyp alýdy júrgizý kezinde únemdeý esebinen qalyptastyryldy», — dep habarlady máslıhattan.

Áleýmettik salaǵa 6,1 mlrd teńge bólý josparda. Onyń ishinde 1,3 mlrd teńgeden — 8 memlekettik kolledjdi aǵymdaǵy jóndeýge, sondaı-aq eki kolledjdi materıaldyq-tehnıkalyq jaraqtandyrýǵa baǵyttalǵan.

Taǵy 1,3 mlrd teńge Úlken kontsert zalyndaǵy jabdyqtardy aýystyrýǵa jáne Oqýshylar saraıynyń balalar mýzyka mektebine arnalǵan jabdyqtardy satyp alýǵa bólinedi.

Bıyl Bostandyq aýdanyndaǵy «Orbıta» shaǵyn aýdanyndaǵy № 145 mektep ǵımaratyn seısmıkalyq kúsheıtý jáne kúrdeli jóndeý jumystary aıaqtalýda, oǵan 145,6 mln teńge bólindi.

Densaýlyq saqtaý salasyna 1,2 mlrd teńge qarastyrylǵan. Ashylǵan sátten bastap alǵash ret myna medıtsınalyq mekemeler boıynsha: № 4 emhana (eki bólimshe), Balalar úıi, Adamnyń kóbeıý ortalyǵy, bıýdjetten kúrdeli jóndeý júrgizýge 600 mln teńge bólinedi.

Qurylysy aıaqtalýǵa jaqyn «Qarasý» shaǵynaýdanyndaǵy otbasylyq-dárigerlik ambýlatorııanyń jobasyna 72,9 mln teńge josparlanǵan.

TKSh salasyna 3,8 mlrd teńge qarastyrylǵan. Naýryzbaı aýdanyndaǵy kóppáterli turǵyn úılerge ınjenerlik jelilerdi júrgizýge 1,5 mlrd teńge bólindi. Jumystar 2023 jyldyń sońyna deıin aıaqtalady.

Almaty ákiminiń usynysy boıynsha «Almaty jastary» baǵdarlamasyn qoldaý jalǵasyp jatyr. Bıýdjetten túrli qyzmet salasynyń jas qyzmetkerleri úshin 55 ıpotekalyq qaryzǵa qosymsha 965 mln teńge bólindi.

Bıyl 7 myń tutynýshyny úzdiksiz elektrmen jabdyqtaýdy qamtamasyz etý úshin «Qaırat» sh/a elektr jelileriniń qurylysy aıaqtalýda. Bul joba 1,2 mlrd teńge kóleminde ınvestıtsııalardy talap etedi.

Kólik ınfraqurylymyn qarjylandyrýǵa 6,2 mlrd teńge qarastyrylǵan.

Sýbsıdııa júıesi arqyly áleýmettik mańyzy bar marshrýttar boıynsha jolaýshylar tasymalyn qoldaýǵa 4,7 mlrd teńge bólý usynylady.

Ulttyq joba aıasynda Almatyda kásipkerlikti qoldaý úshin 1,5 mlrd teńge bólý josparlanǵan. 

Bul qarajat kredıtter boıynsha paıyzdyq mólsherlemelerdi sýbsıdııalaýǵa jáne kásipkerlerdiń damýy men turaqty tabysyna yqpal etetin jańa bıznes-ıdeıalar úshin ınnovatsııalyq grant berýge baǵyttalady.