Almaty bıýdjetine ózgerister engizildi
ALMATY. KAZINFORM – Almaty máslıhatynyń kezekti sessııasynda qala bıýdjeti qaıta qaralyp, únemdelgen qarajat mańyzdy baǵyttarǵa qaıta bólindi.
Almaty qalasy ákiminiń orynbasary Asqar Ámrınniń sózinshe, únemdelgen qarajat – 54,9 mlrd teńge. Atalǵan qarajat qala turǵyndary úshin asa qundy jáne áleýmettik mańyzdy jobalardy iske asyrýǵa baǵyttalatyn bolady.
«Bıýdjetti naqtylaý sheńberinde bilim berý salasyn qarjylandyrý 6,7 mlrd teńgege ulǵaıtyldy. Memleket basshysynyń «Jaıly mektep» jobasyn iske asyrý boıynsha tapsyrmasyn oryndaý sheńberinde Aqbulaq Saıaly jáne Terekti shaǵyn aýdanyndarynda, Rozybakıev – Levıtan kóshesinde 5 600 oryndyq 4 mekteptiń qurylysy aıaqtalýǵa jaqyn. Jańa oqý jylynda atalǵan mekemelerdi qamtamasyz etý úshin 1,1 mlrd teńge bólý josparda. Sondaı-aq, qurylysy júrip jatqan 2 myń oryndyq mektepke kireberis jol men avtomobıl turaǵyn salý úshin 856 mln teńge qarastyrylǵan», – dedi Almaty qalalyq Qarjy basqarmasynyń basshysy Qanat Sýhambekov.
Atalǵan mektepter úshin qosymsha 110 myń danadan astam oqý quraldaryn satyp alýǵa, sondaı-aq 2017 jylǵy 100 myńnan astam eski oqýlyqtardy aýystyrýǵa 225 mln teńge bólinedi. Bul oqýshylardy zamanaýı materıaldarmen qamtamasyz etýge múmkindik beredi.
«2 balabaqshany seısmıkalyq kúsheıtý boıynsha jumystardy jalǵastyrý jáne Aımanov kóshesi, 212 mekenjaıy boıynsha ornalasqan estý qabileti buzylǵan balalarǵa arnalǵan № 137 balabaqshany seısmıkalyq kúsheıtý boıynsha jumystardy bastaý úshin 1,2 mlrd teńge bólý josparda. Sondaı-aq, mektepke deıingi bilim berý uıymdarynda oryn tapshylyǵyn tómendetý maqsatynda Orbıta-3 shaǵyn aýdanynda balabaqshany qaıta jańartýdy jalǵastyrýǵa jáne №10-shy shaǵyn aýdanynda jańa balabaqsha qurylysyn bastaýǵa 1,6 mlrd teńge qarastyrlyp otyr. Bul 600-den astam balany mektepke deıingi bilimmen qamtýǵa yqpal etpek», – dedi ol.
Budan bólek, qalalyq ortany kóriktendirýge jáne qala ekologııasyn jaqsartýǵa 5,3 mlrd teńge qarastyrylǵan.
Qorshaǵan ortany qorǵaý salasyndaǵy negizgi máselelerdi sheshý úshin «ECO Almaty» JShS bazasynda ekologııalyq quzyret ortalyǵy qurylady. Bul baǵyttyń negizgi mindetteri –atmosferalyq aýany, sýdy jáne topyraqty qorǵaý, sondaı-aq óndiris pen tutyný qaldyqtaryn esepke alý, kádege jaratý jáne zalalsyzdandyrý normalary men erejelerin saqtaý. Jergilikti bıýdjetten 124,9 mln teńge bólinbek.
«Turǵyn úı-kommýnaldyq sharýashylyq salasyn qarjylandyrý osyndaı naqtylaýmen 6,9 mlrd teńgege ulǵaıtyldy. Respýblıkanyń bıýdjetinen iri bıýdjettik ınvestıtsııalyq jobalardy jetkiliksiz qarjylandyrý jaǵdaıynda osy naqtylaýmen sýmen jabdyqtaý jelileri men «Aqsaı» sý jınaǵysh stantsııasynyń qurylysyn jalǵastyrýǵa 4 mlrd teńge bólý josparda», – dedi basqarma basshysy.
Osyǵan deıin, Almatydaǵy Saıran kóliniń jaǵalaýyn abattandyrýǵa 4 mlrd teńge bólingeni týraly jazǵan edik.
Sondaı-aq Almatyda LED-ekrandaǵy jarnamaǵa salynatyn salyq mólsherlemesi artady.
