Almaty-Bishkek jolynda áıel er adamdy júk kóliginiń astyna ıterip jiberdi: Jábirlenýshi kóz jumdy

Almaty-Bishkek tasjolynda áıel er adamdy júk kóligi astyna ıterip jiberdi, dep habarlaıdy Kazinform.

Onyń vıdeosy áleýmettik jelide tarady.  

Almaty oblystyq polıtsııa departamentiniń málimetinshe, oqıǵa 30 qazan kúni bolǵan

«Qarasaı aýdandyq polıtsııa basqarmasyna Almaty-Bishkek tasjolynda Volvo júk kóligi júrgizýshisi belgisiz er adamdy qaǵyp ketkeni týraly habar tústi. Tekserý kezinde áldebir áıel er adamdy júk kóligi astyna ıterip jibergeni anyqtaldy», - dep habarlady polıtsııadan.

Atalǵan derek Qylmystyq kodekstiń 99-baby 1-bóligi boıynsha aýdandyq polıtsııada tirkeldi.

«Jedel izdestirý sharalary barysynda 1963 jyly týǵan áıel ustalyp, ýaqytsha ustaý ızolıatoryna qamaldy. Qazirgi ýaqytta qajetti saraptama  taǵaıyndalyp, tergeý amaldary júrgizilip jatyr», - dep atap ótti departamentten.