Almaty – Bishkek tasjoly 8 jolaqqa deıin keńeıedi
ASTANA. KAZINFORM – «QazAvtoJol» UK» AQ Almaty oblysynyń Qarasaı aýdanyndaǵy halyqaralyq mańyzy bar «Almaty — Bishkek» avtomobıl jolynyń 19 — 27 shaqyrym aralyǵyn kúrdeli jóndeý jáne keńeıtý jobasyn resmı túrde bastady.
Joba Memleket basshysynyń elimizdiń zamanaýı kólik ınfraqurylymyn damytý jónindegi tapsyrmasyn oryndaý aıasynda júzege asyrylyp jatyr.
Atalǵan joba Qazaqstandaǵy eń qarqyndy kólik dálizderiniń birin jańǵyrtýǵa baǵyttalǵan. Bul jolmen táýligine 70 myńnan astam kólik qatynaıdy. Jobany iske asyrý Almaty qalasyna kirip-shyǵatyn baǵyttyń ótkizý qabiletin edáýir arttyrýǵa, jol qozǵalysy qaýipsizdigin kúsheıtýge jáne qala mańyndaǵy eldi mekenderdiń turǵyndaryna, megapolıs qonaqtaryna ári tranzıttik kólikke qolaıly jaǵdaı jasaýǵa múmkindik beredi.
Saltanatty is-sharaǵa ortalyq jáne jergilikti atqarýshy organdardyń ókilderi, jol salasynyń basshylary, merdiger uıymdar men jurtshylyq qatysty.
«QazAvtoJol» UK» AQ basqarma tóraǵasy Darhan Imanashev bul jobanyń elimizdegi eń iri qalalyq aglomeratsııa úshin strategııalyq mańyzǵa ıe ekenin atap ótti.
— Memleket basshysynyń tapsyrmasyn oryndaý aıasynda biz Almaty aglomeratsııasy úshin asa mańyzdy ınfraqurylymdyq jobalardyń birin — «Almaty — Bishkek» avtomobıl jolynyń 19 — 27 shaqyrymyn kúrdeli jóndeý jáne keńeıtý jumystaryn bastadyq. Bul — Almatynyń basty kólik qaqpasy. Munda kún saıyn Qazaqstandaǵy eń joǵary kólik qarqyndylyǵynyń biri tirkeledi. Jobany júzege asyrý joldyń ótkizý qabiletin aıtarlyqtaı arttyryp, jol qozǵalysynyń qaýipsizdigin kúsheıtýge jáne júzdegen myń júrgizýshi úshin qolaıly jaǵdaı jasaýǵa múmkindik beredi. Bul — kólik ınfraqurylymyn damytýǵa, óńir ekonomıkasynyń ósýine jáne azamattarymyzdyń ómir sapasyn jaqsartýǵa baǵyttalǵan mańyzdy ınvestıtsııa, — dedi Darhan Imanashev.
Qazirgi tańda qoldanystaǵy tórt jolaqty avtojol kólik aǵynynyń artýyna baılanysty júktemeni tolyq kótere almaı otyr. Sonyń saldarynan turaqty kólik keptelisteri týyndap, qozǵalystyń ortasha jyldamdyǵy tómendep, jol-kólik oqıǵalarynyń qaýpi artýda.
Joba aıasynda avtojol tórt jolaqtan segiz jolaqqa deıin keńeıtiledi. Nátıjesinde bul ýchaske úzdiksiz qozǵalysty qamtamasyz etetin jalpy qalalyq mańyzy bar magıstraldyq kósheniń talaptaryna sáıkestendiriledi.
Kúrdeli jóndeý barysynda:
— «Taǵa» úlgisindegi eki zamanaýı kólik aıryǵy;
— toǵyz jerústi jaıaý júrginshiler ótkeli;
— búkil ýchaske boıynda jaıaý júrginshiler jolaǵy;
— syrtqy jaryqtandyrý júıesi;
— jańa kúrdeli jol jabyny salynady.
Sonymen qatar joba aıasynda gaz qubyrlary, sý qubyry jelileri, elektrmen jabdyqtaý júıeleri jáne talshyqty-optıkalyq baılanys jelileri sııaqty ınjenerlik kommýnıkatsııalar kóshiriledi.
Joba aıaqtalǵannan keıin Almaty men qala mańyndaǵy eldi mekender arasyndaǵy jol júrý ýaqyty edáýir qysqarady.
Megapolıske kireberistegi negizgi baǵyttardyń biriniń ótkizý qabileti artyp, kólik júktemesi azaıady, jol qozǵalysy qaýipsizdigi kúsheıedi jáne jergilikti ári tranzıttik kólik úshin qolaıly jaǵdaı qalyptasady.
Bul joba halyqaralyq jol jelisin keshendi jańǵyrtý jumystarynyń kezekti kezeńi ári Qazaqstandaǵy eń iri qalalyq aglomeratsııanyń kólik ınfraqurylymyn damytýǵa qosylǵan mańyzdy úles bolmaq.
Aıta ketelik «Almaty – Qaskeleń» avtojoly segiz jolaqqa deıin keńeıtiletini týraly jazǵan edik.
