«Almaty — Bishkek» avtojolynyń bir bóligi segiz jolaqqa deıin keńeıtiledi

ASTANA. KAZINFORM — Keptelisterdi azaıtý jáne ótkizý qabiletin arttyrý maqsatynda «Almaty — Bishkek» avtojolynyń 19–27 shaqyrym aralyǵyndaǵy qozǵalys tórt jolaqtyń ornyna segiz jolaq boıynsha uıymdastyrylmaq. Bul týraly QazAvtojol baspasóz qyzmeti habarlady. 

Qazirgi ýaqytta jobalaý-izdestirý jumystary júrgizilip jatyr. Joba aıasynda ortalyq bólý jolaǵyn, zamanaýı jaryqtandyrý júıesin, avtobýs aıaldamalaryn jáne jaıaý júrginshilerge arnalǵan jer ústi ótkelin salý qarastyrylǵan. Budan bólek, qozǵalys qaýipsizdigin arttyryp, kólik baılanysyn jaqsartý úshin «taǵa» pishinindegi eki jolaıryq salý josparlanyp otyr.

Jobalaý — kúrdeli ári kóp kezeńnen turatyn protsess. Qazir geologııalyq, ekologııalyq jáne geodezııalyq zertteýler aıaqtalýǵa jaqyn. Jobalaý jumystary osy jyldyń sońyna deıin aıaqtalady dep josparlanǵan.

Jobalaý nátıjesinde daıyndalǵan qujattama memlekettik saraptamaǵa joldanady. Saraptamadan oń qorytyndy alynyp, qarjylandyrý bólingennen keıin qurylys jumystary bastalady. Bul joba Almaty qalasy men shekara mańy baǵytyndaǵy jol ınfraqurylymyn jańǵyrtýdyń mańyzdy qadamy bolmaq. 

Aıta ketelik Pavlodar óńirindegi avtojoldardyń qysqy kútimine 40 merdiger jaýapty bolatyny týraly jazǵan edik.