Almaty - Bishkek avtojolynda jol-kólik oqıǵasynan 4 adam qaıtys boldy

QONAEV. KAZINFORM – Polıtsııa jol-kólik oqıǵasy boıynsha qylmystyq is qozǵady.

Almaty oblysy Polıtsııa departamentiniń málimetinshe, qaıǵyly oqıǵa 28 mamyr saǵat 18:00 shamasynda Almaty - Bishkek avtojolynyń 44 shaqyrymynda bolǵan.

Túrkistan oblysynyń 39 jastaǵy turǵyny basqaryp kele jatqan KamAZ markaly júk kóliginiń tirkemesi jolda ajyrap ketken.

Ajyrap ketken tirkeme qarsy qozǵalys jolaǵyna shyǵyp, Geely kóligimen, odan keıin KIA Sportage kóligimen soqtyǵysqan. Oqıǵa ornynda tórt adam qaza tapty, onyń ishinde Geely júrgizýshisi de bar. Qazir jan-jaqty tergeý júrgizilip jatyr. Oqıǵanyń mán-jaıy men sebebi anyqtalady, - dep habarlady departamentten.

Eske salaıyq, buǵan deıin Almaty oblysynda jasóspirim basqarǵan kólik aǵashqa soqtyǵysyp, 3 oqýshy mert bolǵanyn jazǵanbyz.