Almaty botanıkalyq baǵynda 72 jyl boıy ósip turǵan aǵash kesildi
ALMATY. KAZINFORM — Almatynyń Bas botanıkalyq baǵy kópjyldyq tarıhy bar Vavılon talyn alyp tastaýǵa májbúr bolǵan.
Bul týraly baqtyń baspasóz qyzmeti áleýmettik jelide habarlady. Resmı málimdemege sáıkes, 16 maýsymda qatty jel men naızaǵaı kezinde baqtaǵy eń tanymal aǵashtardyń biri — Vavılon talynyń (Salix babylonica) 10 metrden asatyn iri dińi synyp túsken. Qulaǵan kezde qorshaý men jaıaý júrginshilerge arnalǵan jıektas búlingen. Biraq kelýshilerdiń eshqaısysy zardap shekken joq.
— Oqıǵadan keıin mamandar aǵashqa egjeı-tegjeıli zertteý júrgizdi. Onyń nátıjesinde aǵashta jasyna baılanysty eleýli ózgerister bary anyqtaldy. Dál osy jasyryn aqaýlar ekstremaldy jel júktemesimen qatar kelip, dińniń synýyna sebep bolǵan. Vavılon taly 1954 jyldan beri baqta ósip tur. Aǵash jetpis jyldan astam ýaqyt boıy Botanıka jáne fıtoıntrodýktsııa ınstıtýtynyń ǵylymı kollektsııasynyń bir bóligi, — delingen málimdemede.
Sonymen qatar botanıkalyq baq tal óziniń sándik kórinisin saqtaǵanmen, júrgizilgen zertteý barysynda onyń ishki bóliginde eleýli zaqymdar anyqtalǵanyn habarlady. Atap aıtqanda: dińiniń túbinde tereń qýys paıda bolǵan, qabyǵy ajyraǵan, diń zııankesteri zaqymdaǵan jáne ózek bóligi shirigen.
— Eski aǵashtardyń syrtqy kórinisi olardyń ishki jaǵdaıyn árdaıym kórsete bermeıdi, — dedi baq mamandary.
Botanıkalyq baq málimetinshe, mamandar aǵashtyń bıologııalyq jaǵdaıyn, qalǵan mehanıkalyq beriktigin jáne ony qaýipsiz túrde saqtap qalý múmkindigin baǵalǵan. Nátıjesinde taldyń qalǵan bóligi avarııalyq jaǵdaıda dep tanyldy. Onyń kenetten qulaý qaýpi bar.
— Arnaıy sharalar arqyly aǵashty qaýipsiz túrde saqtap qalý múmkin bolmady, al ony odan ári paıdalanýdy jalǵastyrý adamdardyń ómiri men densaýlyǵyna qaýip tóndiretin edi. Osyǵan baılanysty aǵashty alyp tastaý týraly sheshim qabyldandy. 2026 jylǵy 31 tamyzda vavılon taly tolyqtaı alynyp tastaldy, — dep túsindirdi baq baspasóz qyzmeti.
Sonymen qatar bul aǵashtyń tarıhy Almaty úshin osymen úzilmeıtini atap ótildi. 2022 jyly eski taldyń janyna jas aǵash otyrǵyzylǵan. Búginde ol belsendi ósý kezeńinde eken. Botanıkalyq baq bul tal ýaqyt óte kele baqtyń jańa sımvolyna aınalatynyn atap ótti.
Eske salaıyq, buǵan deıin Almatyda kóshedegi aǵashtar zańsyz kesilgeni anyqtaldy.
