Almaty bes aımaqqa bólinedi
ALMATY. KAZINFORM — Almatynyń jańa bas josparyna sáıkes, megapolıste bir ortalyqtyń ornyna «Soltústik», «Batys», «Ońtústik-batys», «Shyǵys qaqpasy» jáne «Tarıhı ortalyq» sııaqty bes ortalyq paıda bolady.
Almaty ákimi Darhan Satybaldy «Almatybasjospar» — da keńes ótkizdi. Qala basshysyna bes negizgi polıortalyq — iskerlik belsendilikti qaıta bólýge, qalanyń ortalyq aýdandarynda júktemeni azaıtýǵa jáne búkil megapolıs boıynsha tolyqqandy ósý núktelerin qurýǵa arnalǵan zamanaýı qoǵamdyq-iskerlik klasterlerdi qalyptastyrý jobasy usynyldy.
«Soltústik» polıortalyǵy — «Almaty-1» temirjol stantsııasyna irgeles aýmaq. Bul polıortalyqta qyzmet kórsetý salasy qarqyndy damıtyn bolady, salynyp jatqan qurylystarda birinshi qabattar shaǵyn bızneske jalǵa beriledi, skverler, Úlken Almaty kaanaly, Baým toǵaıy mańaıynda demalys oryndary qarastyrylǵan.
Kelesi aımaq — «Batys» polıortalyǵy, jańa Almaty-3 temirjolvokzaly men Boraldaı kentindegi kólik haby aýdanynda ornalasatyn bolady. Munda barlyq qajetti ınfraqurylym, sonyń ishinde «Saq qorǵandary» etnografııalyq parkiniń aınalasynda júrgiziletin bolady. Alańy 90 gektar jelilik rekreatsııalyq saıabaq, jańa kópsalaly aýrýhana keshenin salý josparda.
«Ońtústik-batys» polıortalyǵy — Raıymbek dańǵyly men Alataý kóshesin uzartý aýmaǵynda. Munda shaǵyn ónerkásiptik parkter, saýda jáne logıstıka nysandary, ákimshilik-iskerlik ortalyqtar ornalasady.
«Tarıhı ortalyq» — Medeý aýdanynyń bóligi, Baıtursynov kóshesi — Abaı — Zenkov — Jibek Joly dańǵyldarynyń shekarasyndaǵy «altyn aımaq». Munda ónerkásip oryndary bolmaıdy, tarıhı-mádenı mańyzy bar ǵımarattar qalpyna keltiriledi.
Besinshi aımaq — «Shyǵys qaqpasy» polıortalyǵy. Bul Talǵar jáne Qulja trakttarynyń aýdany. Munda Almatynyń logıstıkalyq haby ornalasady.
Óz kezeginde qala ákimi árbir polıortalyq áleýmettik ınfraqurylymdy, demalys aımaqtaryn jáne adamdar men bıznesti tartatyn zákirlik jobalardy eskere otyryp, keshendi túrde damýy tıis ekenin atap ótti.
— Turǵyn úı salýǵa basymdyq berilmeıtindeı jáne 5 jyldan keıin bul aýdandar tynysh aýdandarǵa aınalmaıtyndaı etip jobalardy pysyqtaý qajet. Saıabaqtar, saýda ortalyqtary, keńseler josparlaý kezeńinde qarastyrylýy tıis. Adamdar ómir súrip qana qoımaı, jumys isteıtin, demalatyn, bos ýaqytyn ótkizetin teńestirilgen ortany qurý mańyzdy — aýdandar shynaıy jaıly jáne tynys-tirshilikke toly bolǵany jón, — dep atap ótti Darhan Satybaldy.
Eske salaıyq, 2023 jyly Úkimet Almaty qalasynyń 2040 jylǵa deıingi Bas josparyn bekitti.
Buǵan deıin Almatyda 2040 jylǵa qaraı bir emes, bes ortalyq paıda bolatyny týraly jazǵanbyz.