Almaty Belgııadaǵy týrıstik forýmda marapatqa ıe boldy
ASTANA. KAZINFORM – Eýropa astanasynda 20-dan astam elden halyqaralyq uıymdar men týrızm ındýstrııasynyń ókilderi jınalǵan «Global Tourism Forum» týrıstik forýmy ótip jatyr. Bıyl elimizdiń ońtústik astanasy «Global Tourism Forum»-nyń arnaıy júldesi — «Týrızm ınnovatsııalary men qalalyq transformatsııa úshin arnaıy qurmet» marapatyna ıe boldy, dep habarlaıdy Kazinform menshikti tilshisi.
Forým aıasynda Qazaqstan Elshiligi elimizdi Eýrazııa júreginde serpindi damyp kele jatqan týrıstik baǵyt retinde tanytatyn ulttyq kórme uıymdastyrdy.
Qatysýshylardy Almaty Tourism Bureau-nyń Almaty qalasy men oǵan jaqyn óńirdiń týrıstik áleýetin tanystyrýy erekshe qyzyqtyrdy.
Tanystyrý kezinde qysqy jáne taýdaǵy demalys, ekotýrızm, etnomádenıet, shytyrman oqıǵaly jáne gastronomııalyq týrızm múmkindikteri kórsetildi. Qazaqstannyń qaıtalanbas tabıǵı alýan túrliligine, baı tarıhı murasyna, qazaq halqynyń qonaqjaılyǵyna erekshe nazar aýdaryldy.
Forým aıasynda Almaty qalasy World Tourism Awards 2025 bedeldi marapatyna ıe boldy. Bul – týrıstik ınnovatsııalar men qalalyq transformatsııa úshin beriletin arnaıy marapat.
- Almaty ınnovatsııalar, turaqty damý jáne aqyldy qalany aqyldy josparlaý ony jahandyq týrıstik sahnaǵa qalaı shyǵaratynyn tanytyp otyr. Qazaqstan jahandyq týrızm ındýstrııasynyń mańyzdy oıynshysyna aınalyp otyr, - dep atap ótti Dúnıejúzilik týrıstik forým ınstıtýtynyń prezıdenti Býlýt Bagjy.
Almaty qalasy týrızm bıýrosy departamentiniń basshysy Asqar Tóleýtaı atap ótkendeı, 2024 jyly Almatyǵa 2,3 mln týrıst kelgen, bul 2023 jylmen salystyrǵanda 15 paıyz kóp.
- 2025 jyly Almatyǵa kelgen týrıster sany 2024 jyldyń sáıkes kezeńimen salystyrǵanda 10% joǵary, ıaǵnı týrıster sanynyń artýyna oń serpin bar, - dep qosty ol.
Global Tourism Forum — týrızm ındýstrııasynyń kóshbasshylaryn, úkimet, bıznes jáne sarapshylar qaýymdastyǵy ókilderin biriktiretin halyqaralyq dıalog alańy. Forým turaqty týrızmdi damytý, ozyq tájirıbeler almasý jáne jahandyq týrıstik ekonomıkanyń ósýine yqpal etetin ınnovatsııalardy ilgeriletýdi maqsat etedi.
Qazaqstannyń forýmǵa qatysýy halyqaralyq týrıstik yntymaqtastyqty nyǵaıtý jáne eldiń tartymdy, qaýipsiz jáne ashyq týrıstik baǵyt retinde ımıdjin ilgeriletýde mańyzdy qadam boldy.
Buǵan deıin Qazaqstan Qytaı týrısteri arasynda eń suranysqa ıe 5 eldiń qataryna kirgenin jazǵan bolatynbyz.
Qazaqstan qaı elderden týrısterdi tartýǵa ekpin qoıyp otyrǵanyn myna materıaldan oqı alasyz.