Almaty bazarlarynda satýshylardan aqsha bopsalaǵan qylmystyq top ustaldy
ALMATY. KAZINFORM – Almaty oblysy men Almaty qalasynda ornalasqan saýda bazarlaryn «qorǵaýǵa» alamyz dep, kásipkerlerden aqsha bopsalaǵan qylmystyq top ustaldy.
Almaty oblystyq Polıtsııa departamentiniń basshysy Baýyrjan Álenovtyń aıtýynsha, 27 mamyrda óńirdiń 47 jastaǵy turǵyny habarlasyp, 13 mamyrda Qarasaı aýdanynda belgisiz adamdar kúsh qoldanyp, onyń 3,5 mıllıon teńgesin ıemdengenin jetkizgen.
«25 shildede Uıymdasqan qylmysqa qarsy kúres basqarmasynyń qyzmetkerleri Almaty oblysy boıynsha Ulttyq qaýipsizdik departamentimen birlesip, oblystyq prokýratýranyń kelisýimen 31 jáne 36 jas aralyǵyndaǵy er adamdardy anyqtap, ustady», - dep jazdy oblystyq PD bastyǵy óziniń Instagram-daǵy paraqshasynda.
Kúdiktiler ýaqytsha ustaý ızolıatoryna qamalǵan. Olardyń basqa uqsas qylmystarǵa qatysy bar-joǵy tekseriledi. Qazir tergeý júrip jatyr.
