Almaty – Bangkok reısi tehnıkalyq sebeppen Delıge qondy
ALMATY. KAZINFORM – 18 jeltoqsanda Almaty – Bangkok baǵytynda ushýǵa tıis KC931 reısi tehnıkalyq sebepterge baılanysty Úndistannyń Delı áýejaıyna qonýǵa májbúr boldy.
Air Astana áýe kompanııasynyń málimetinshe, bortta 138 jolaýshy bolǵan. Ushaq Almatydan saǵat 01:00-de ushyp shyǵyp, shtattyq rejımde 05:51-de Delıge qonǵan.
Qazirgi ýaqytta barlyq jolaýshyǵa tamaq berilgen, ýaqytsha vızalar resimdelgen. Áýe kompanııasy jolaýshylardy qonaq úıge ornalastyrý máselesin sheship jatyr.
– Sonymen qatar reısti Bangkokqa deıin jalǵastyrý úshin rezervtik ushaq daıyndalyp jatyr, - delingen habarlamada.
Qosymsha aqparat alý úshin jolaýshylar +7 702 702 00 74 nómiri arqyly áýe kompanııasynyń WhatsApp jedel jelisine habarlasýǵa bolady.
Eske salaıyq, keshe, 2025 jylǵy 17 jeltoqsanda Almaty – Astana baǵyty boıynsha KC 851 reısin oryndaǵan Air Astana áýe kompanııasynyń ushaǵy borttaǵy kondıtsııalaý júıesinen ıistiń paıda bolýyna baılanysty ekıpajdyń sheshimimen ushý áýejaıyna oralǵanyn habarlaǵanbyz.