Almaty – Bangkok baǵyty: Thai AirAsia X áýe kemelerine otyn jetkizý jolǵa qoıyldy
ASTANA. KAZINFORM – «QazMunaıGaz-Aero» JShS Taı eliniń Thai AirAsia X áýe kompanııasymen kelisimshart jasasyp, Almaty — Bangkok baǵyty boıynsha jolaýshylar reısterin turaqty oryndaıtyn áýe kemelerine janarmaı quıa bastady. Bul týraly QazMunaıGaz kompanııasy málim etti.
Kelisim aıasynda QMG-nyń enshiles kompanııasy Almaty halyqaralyq áýejaıynda barlyq protsedýralardyń avıatsııalyq qaýipsizdiktiń, otyn sapasy men operatsııalyq tıimdiliktiń álemdik standarttaryna saı «ushaq qanatyna» janarmaı quıýdy qamtamasyz etedi.
— Ońtústik-Shyǵys Azııa elderiniń iri tasymaldaýshylardyń birine qyzmet kórsetý — halyqaralyq avıakompanııalardyń tarapynan Qazaqstan naryǵyna qyzyǵýshylyqtyń turaqty ósýine jáne Almatydan ushatyn marshrýttyq jeliniń keńeıýine yqpal etedi. Qol jetkizilgen ýaǵdalastyqtar elimizdegi halyqaralyq avıatasymaldaýshylar úshin avıaotyn qunyn tómendetýdiń jáne elimizdegi negizgi avıatsııalyq torabynda otynmen qamtamasyz etý jaǵdaılarynyń básekege qabiletti bolýyn arttyrýdyń arqasynda múmkin boldy, — delingen habarlamada.
Qolǵa alynyp, iske asyp jatqan sharalar — Memleket basshysynyń eldegi kólik-logıstıkanyń áleýetin damytýǵa, otandyq áýejaılardyń básekege qabilettiligin arttyrýǵa jáne shetel avıakompanııalaryn tartý úshin qolaıly jaǵdaı jasaýǵa baǵyttalǵan tapsyrmalaryn oryndaý aıasyndaǵy júıeli jumystyń bir bóligi.
— QMG-Aero QR Úkimetiniń qoldaýymen jetekshi halyqaralyq tasymaldaýshylarmen yntymaqtastyqty keńeıtý jáne Qazaqstan áýejaılarynda avıaotynmen qamtamasyz etýdiń ashyq, turaqty jáne básekege qabiletti jaǵdaılardy qalyptastyrýǵa baǵyttalǵan júıeli jumysty jalǵastyrýda. Sheteldik tasymaldaýshylar ózderiniń marshrýttyq jelisin keńeıtýdiń núktesi retinde elimizdiń áýejaılaryn tańdaǵany biz úshin mańyzdy. Biz, óz kezeginde, janarmaı quıý operatsııalarynyń turaqtylyǵyn, qaýipsizdigin jáne joǵary sapasyn qamtamasyz etemiz, — dedi QMG-Aero kompanııasynda.
Thai AirAsia X — Taı eliniń avıakompanııasy. AirAsia tobyna kiredi. Tasymaldaýshy Qazaqstan, Japonııa, Ońtústik Koreıa, Avstralııa, QHR jáne Taıaý Shyǵys elderine reısterdi turaqty oryndaıdy.
Eske sala ketsek, buǵan deıin QMG-Aero SpaceBee Airlines, AZAL Azerbaijan Airlines, My Freighter Airlines pen Easy Charter, sondaı-aq Turkish Airlines kompanııalarymen Almaty áýejaıynda áýe kemeleriniń «ushaq qanatyna» otyn quıýǵa kelisimsharttar jasasqan bolatyn.