Almaty ájeleri uzyndyǵy 110 metr bolatyn syrmaq syryp jatyr
ALMATY. KAZINFORM – Almaty qalasynyń Bostandyq aýdanynda uzyndyǵy 110 metr bolatyn biregeı syrmaq ázirlenip jatyr.
Jobany aýdan ákimdiginiń qoldaýymen «Qazaq analary» ájeler qaýymdastyǵy júzege asyrýda.
Buıym dástúrli basý jáne tigý tásilderi arqyly qolmen jasalýda. Syrmaq klassıkalyq qazaqy oıý-órnekpen kómkerilip, árbir órnek pen ár bólsheginde urpaq sabaqtastyǵy, ulttyq qolónerge degen qurmet pen mádenı murany saqtaý nıeti beınelengen.
Uıymdastyrýshylardyń málimetinshe, jumysty 21 naýryzǵa deıin aıaqtaý josparlanyp otyr. Naýryz merekesinde úlken syrmaq kópshilik nazaryna usynylady.
Joba avtorlary daıyn buıymdy Gınnestiń rekordtar kitabyna engizýdi kózdep otyr.
Aıta keteıik, byltyr Aqtaýda 11 eldiń sheberi qoıdyń júninen tekemet basyp shyǵardy.