Almaty aınalma temirjolynyń qashan salynyp bitetini belgili boldy
ASTANA. KAZINFORM — Temirjol jáne sý kóligi komıtetiniń tóraǵasy Jánibek Taıjanov Almaty aınalma temirjoly, Darbaza–Maqtaaral jáne Baqty–Aıagóz jańa temirjol jelileriniń qurylysy qashan aıaqtalatynyn aıtty.
— Qazirgi tańda jańa temirjol jelileri salynyp jatyr. Sondaı-aq qoldanystaǵy jeliler jańǵyrtylyp, zamanaýı basqarý júıeleri engizilip jatyr. Kelesi aıdyń ortasynda Dostyq–Moıynty ýchaskesindegi ekinshi jolda poıyz qozǵalysyn ashý josparlanyp otyr. Qazirgi tańda qurylys jumystary aıaqtalýǵa taıap qaldy. Bul jobanyń iske qosylýy ýchaskeniń ótkizý qabiletin 5 esege arttyryp, poıyzdardyń qozǵalys jyldamdyǵyn 1500 km/táýlikke deıin jetkizýge múmkindik beredi, — dedi ol OKQ alańynda.
Sondaı-aq komıtet basshysy Almaty aınalma temirjolynyń qurylysy qashan aıaqtalatynyn aıtty.
— Jyl sońyna deıin, josparǵa saı, Almaty aınalma temirjol jelisi jobasynyń qurylysy aıaqtalady. Búgingi tańda bul joba jumystarynyń negizgi bóligi oryndaldy. Qoldanysqa engizilgennen keıin ol Almaty torabyn 40%-ǵa deıin jeńildetýge jáne júktiń jetkizilý ýaqytyn 24 saǵatqa qysqartýǵa múmkindik beredi, — dedi Jánibek Taıjanov.
Budan bólek spıker Darbaza — Maqtaaral jáne Baqty — Aıagóz jańa temirjol jelileriniń qurylysy júrip jatqanyn aıtty.
— Bul jobalardy iske asyrý Ortalyq Azııa baǵyty boıynsha ótkizý qabiletin qosymsha 20 mln tonnaǵa, al Qytaı baǵyty boıynsha 25 mln tonnaǵa deıin arttyrýǵa múmkindik beredi. Atalǵan jobalardy aıaqtaý merzimi — tıisinshe 2026 jáne 2027 jyldar, — dep túıdi sózin ol.
Aıta keteıik, elimizde 2029 jylǵa deıin 11 myń km temirjol jóndeledi.
Aldaǵy maýsym jáne qyrkúıek aılarynda eki jańa elektropoıyz baǵdary ashylady.
Sondaı-aq áıelderge arnalǵan vagony bar jolaýshylar poıyzynyń sany 12-ge jetti.