Almaty aıaldamalary aldaǵy 2 jylda tolyq jańarady
ASTANA. KAZINFORM - Almaty qalasynyń ákimi Erbolat Dosaev Áýezov aýdanynyń turǵyndarymen kezdesti.

Aýdan turǵyny qaladaǵy eskirgen aıaldamalarǵa shaǵymdanyp, olardy ulttyq oıý-órnekpen árlep jańartýdy usyndy.
- Qala baǵdarlama ázirledi. Bıyl kúzde jumystardy bastap, aldaǵy 2 jyldyń ishinde kezeń-kezeńmen aıaldama keshenderin jańartamyz. Onda tıisti avtobýs marshrýttary boıynsha aqparattyq taqta bolady. Qalanyń soltústik bóligindegi temir aıaldamalardy almastyrýǵa tyrysamyz. Ádemi aıaldamalardyń kóbi ınvestorlar esebinen isteldi. Qala ózgerip keledi, sondyqtan ınvestorlarǵa aıaldamaǵa jarnama ornalastyrý tek ońtústik bólikte emes, basqa aımaqtarda da qyzyq bolady dep oılaımyn. Ol bolmasa qala áleýmettik jarnama ornalastyrady, - dedi Erbolat Dosaev.
Qala ákimi jobalaý-smetalyq qujattama daıyn bolǵan jaǵdaıda jumys qyrkúıek-qazan aıynda bastalatynyn naqtylady. Sondaı-aq ol adam kóp júretin aıaldamalar úlkeıip, al jolaýshylary azdary kishireıetinin atap ótti.
Eske salaıyq, buǵan deıin Almatynyń aıaldama keshenderine biryńǵaı dızaın-kod jasalyp jatqanyn jazǵanbyz. Jobamen «AlmatyBasJospary» ǴZI mekemesi aınalysyp jatyr.