Almaty áýejaıynyń ishki termınalyn jańǵyrtý jumystary shildede aıaqtalady
ALMATY. KAZINFORM — Almatyda halyqaralyq áýejaıynda aýqymdy jańǵyrtý jumystary júrgizilip jatyr. Bul týraly Almaty qalasy ákiminiń orynbasary Oljas Smaǵulov aıtty.
Onyń sózinshe, 2050 jylǵa deıin eseptelgen Horizon jobasy aıasynda áýejaıdyń kelbeti túbegeıli jańaryp, termınaldar jańǵyrtylady, jolaýshylar qabyldaý áleýeti artyp, zamanaýı servıster engiziledi.
Joba aıasynda ishki termınaldyń ótkizý qabileti jylyna 3 mıllıonnan 7 mıllıon jolaýshyǵa deıin ulǵaıady. Sonymen qatar 1500 oryndyq jabyq kópdeńgeıli avtoturaq salynyp jatyr. Joba birneshe kezeń boıynsha júzege asyrylady.
— Jańa kópdeńgeıli avtoturaq jobasy turaq oryndarynyń jalpy sanyn 2275-ke deıin jetkizedi. Bul jolaýshylar úshin qolaılylyq pen qaýipsizdik deńgeıin edáýir arttyrady, — dedi Oljas Smaǵulov.
Almaty ákiminiń orynbasary qazirgi jumystar 2028 jylǵa deıin josparlanǵan birinshi kezeń aıasynda júrgizilip jatqanyn atap ótti. Jobanyń jalpy ınvestıtsııa kólemi — 362 mln AQSh dollary.
Sonymen qatar ishki termınaldy qaıta jańǵyrtý jumystary 2026 jylǵy 11 shildede aıaqtalady. 2027-2028 jyldary tranzıttik jolaýshylar men ekıpajdarǵa arnalǵan jańa qonaqúı kesheni salynady, zamanaýı kólik jáne avtoturaq júıesin qalyptastyrý josparlanǵan.
— Buǵan qosa, áýejaıdyń jańa deńgeıde jumys isteýin jáne halyqaralyq standarttarǵa saı bolýyn qamtamasyz etý úshin óndiristik, qoımalyq jáne ákimshilik nysandar da salynyp jatyr, — dedi ol.
Eske salaıyq, byltyr Almaty áýejaıynda ınvestıtsııalyq Horizon jobasy bastalǵanyn jazǵanbyz.
