Almaty áýejaıynyń prezıdenti jańa termınalǵa aıtylǵan synǵa jaýap berdi
ALMATY. KAZINFORM – 1 maýsym kúni iske qosylǵan Almaty áýejaıynyń jańa termınalynda BAQ ókilderine baspasóz týry uıymdastyryldy. Іs-shara barysynda halyqaralyq áýejaıdyń jaqynda taǵaıyndalǵan prezıdenti Goker Kose jańa termınalǵa áleýmettik jelide aıtylǵan synǵa jaýap berdi.
Áýejaı basshysy jańa termınaldyń áınegi shytynaǵany beınelengen vıdeoǵa baılanysty pikir bildirdi.
«Bul ǵımarat seısmıkalyq normalar men standarttarǵa saı salynǵan. Biraq jańa ǵımarat kishkene otyrady. Sol turaqtaný kezinde keıbir shyny men áınekterde kishigirim jarylǵan jerler bolady. Biz ony almastyramyz. Bul qalypty jaǵdaı», - dedi áýejaı prezıdenti.
Sondaı-aq ol keı jolaýshylardyń júkti uzaq kútýiniń sebebin túsindirdi. Goker Koseniń aıtýynsha, mundaı qıyndyqtar eski termınaldan jańasyna kóshý kezinde týyndaǵan. Aldaǵy ýaqytta júkteri alý protsesin 45-50 mınýttan asyrmaý josparlanyp otyr.
«Infraqurylym boıynsha biz barlyq jumystary aıaqtadyq. Biraq keıbir kommertsııalyq aımaqtar áli salynyp jatyr. Eski termınaldan jańasyna kóshý kezinde qıyndyqtar týyndady. Jolaýshylar men olardyń júkterin qabyldaý tehnologııalary jáne jańa jabdyqtar ornatylyp jatyr. Keıbiri tolyq ornatylǵan joq. Sondyqtan osyndaı keleńsiz oqıǵalar bolyp jatyr. Biraq jaqyn ýaqytta ondaı keleńsizdikter tolyqtaı sheshiledi dep ýáde bere alamyn. Ushaq qonǵan sátten bastap, júk alǵan sátke deıingi ýaqytty 45-50 mınýtqa jetkizemiz», - dedi ol.
Almaty áýejaıynyń prezıdenti jańa termınal búginge deıin 1,5 myń reısti qabyldaǵanyn jáne kúndelikti 16 myń jolaýshyǵa qyzmet kórsetip jatqanyn atap ótti. Sondaı-aq Goker Kose almatylyqtardy ýaqytsha qolaısyzdarǵa túsinistikpen qaraýǵa shaqyryp, oryndy syndy qabyldaýǵa daıyn ekenin aıtty. Onyń sózinshe, jańa termınalǵa kóshý jumystaryn júrip kele jatqan kóliktiń dóńgelegin aýystyrýmen salystyrýǵa bolady.
«Iá, synnan habarym bar. Ótkenge qaraıtyn bolsaq, eski termınaldyń syıymdylyǵy 2,5 mıllıon boldy. Alaıda biz 10 mıllıonǵa deıin jolaýshyǵa qyzmet kórsettik. Ekinshisi, biz jańa termınalǵa tez arada kóshýge májbúr boldyq. Eger biz bul termınalǵa kóshpegende kóptegen reısterden bas tartýǵa týra keletin edi. Kóshý kezinde árıne, keleńsiz jaǵdaılar bolyp turady. Biz oryndy synǵa daıynbyz jáne ol boıynsha jumys isteımiz. Álemdik tájirıbeden jumys istep jatqan termınaldan jańa termınalǵa kóshý jáne ekeýin bir ýaqytta basqarý óte qıyn ekenin bilemiz. Eýropada bul 4 jylǵa deıin sozylatyn edi. Biz muny 2 jylda jasaı aldyq. Bul jyldamdyqpen kele jatqan kóliktiń dóńgelegin aýystyrý sekildi», - dep atap ótti Goker Kose.
Aıta keteıik, buǵan deıin Prezıdent Almaty áýejaıynyń jańa halyqaralyq termınalyn aralaǵanyn jazǵan edik.
Al 1 maýsym kúni Almaty áýejaıynyń jańa termınaly alǵashqy reısterdi qabyldady.
14 maýsym kúni Almaty áýejaıyndaǵy barlyq halyqaralyq reıster jańa termınalǵa aýystyryldy.
Sondaı-aq Almaty halyqaralyq áýejaıynyń jańa prezıdenti bolyp Goker Kose taǵaıyndaldy.
