Almaty áýejaıynyń mańynda qurǵaq shóp órtendi

ALMATY. KAZINFORM - Áleýmettik jelide áýejaı aýmaǵyna jaqyn mańda qara tútin shyqqany týraly aqparat tarady. 

Almaty áýejaıy baspasóz qyzmeti áýe aılaǵynyń aýmaǵynda eshqandaı tótenshe jaǵdaı bolmaǵanyn málimdedi. Al Almaty oblysy TJD málimetinshe, 10:44-te departamenttiń kezekshi bólimine Talǵar aýdany Gúldala aýyldyq okrýginiń aýmaǵynda qurǵaq shóp órtengeni týraly qońyraý kelip túsken.

- Órtti joıý úshin oqıǵa ornyna Ótegen Batyr aýylynyń №8 órt sóndirý bóliminiń 3 qyzmetkeri men arnaıy tehnıka, sondaı-aq Almaty qalasynyń №11 órt sóndirý bóliminiń 4 qyzmetkeri men bir tehnıka jiberildi. Órt sóndirýshiler 500 sharshy metr aýmaqta qurǵaq shóp órtengenin anyqtady. 12:18-de ot tolyq óshirildi. Zardap shekkender joq, - dep habarlady oblystyq TJD baspasóz qyzmeti.

Eske salaıyq, buǵan deıin Almaty qoımalarynda órt faktileri nelikten kóbeıgenin jazǵanbyz.