Mýzeı, 3 VIP bólme, Duty Free: Almaty halyqaralyq áýejaıynyń qazirgi kelbeti qandaı
ALMATY. KAZINFORM – Almaty halyqaralyq áýejaıynyń jańa termınalynda baspasóz týry uıymdastyryldy. Mekemeniń jańa basshysy Goker Kose áýejaıdyń eski jáne jańa termınaldarynyń josparymen bólisti.
Onyń aıtýynsha, jańa jolaýshylar termınalyna 220 mıllıon dollardan astam ınvestıtsııa salynǵan. Seısmıkalyq jáne órt qaýipsizdigi talaptaryna saı salynǵan halyqaralyq termınal 10 ballǵa deıingi jer silkinisine tótep bere alady. Áýejaıdyń jalpy aýdany – 53,5 myń sharshy metr.
– Jańa termınalda 50 tirkeý orny ornatyldy jáne sońǵy úlgidegi zamanaýı jabdyqtar satyp alyndy. Eki «fast-track» qurylǵysy, 5 ózin-ózi tirkeý dúńgirshegi, 5 «baggage drop-off» qurylǵysy ornatylady. Jańa termınal saǵatyna ushatyn 24 myń jolaýshyǵa, ushyp kelgen 33 myń jolaýshyǵa qyzmet kórsete alady. Jolaýshylardy tólqujattyq baqylaýdan ótkizý kezinde zamanaýı jáne jaıly jaǵdaımen qamtamasyz etý úshin jańa termınaldyń ushý aımaǵynda 20 kabına, kelý aımaǵynda 32 kabına, Qazaqstan Respýblıkasynyń azamattary úshin ushý-kelý aımaǵynda avtomattandyrylǵan ótkizý júıesi boıynsha 4 birlik jabdyq ornatylǵan. Jolaýshylarǵa yńǵaıly júrip-turý úshin aqparattyq dúńgirshekterdi ornatý josparlanýda, - dedi áýejaı basshysy.
Sonymen qatar Goker Kose 2019 jyly 6,5 mln jolaýshy Almaty áýejaıy arqyly ótse, 2023 jyly 9,5 mln jolaýshyǵa qyzmet kórsetilgenin atap ótti. Bıyl jolaýshylar sany 11 mıllıonnan asady dep kútilýde. Degenmen, eski termınal jańartylǵan soń, áýejaıdyń jalpy ótkizý qabileti jylyna 14 mıllıon jolaýshyǵa deıin artpaq.
Áýejaı prezıdenti avtoturaq máselesine de toqtaldy. Onyń sózinshe, qazir jalpy avtoturaq kólemi 46%-ǵa ulǵaıǵan. Áýejaı aýmaǵynda avtoturaq ornyn kóbeıtýdiń qalǵan jumystary 2024 jyldyń 15 tamyzyna deıin aıaqtaý josparlanǵan.
– Biz avtoturaq aımaqtaryn jańartýǵa jáne qaıta jabdyqtaýǵa kiristik. Bizdiń avtoturaqtyń syıymdylyǵy aldyńǵy 900 turaq ornynan 1 300 turaq ornyna deıin artady. Biz aýmaqty birtindep jańartýdy jáne kóp qabatty avtoturaqqa qosylatyn kópirdi jóndeýdi josparlap otyrmyz, - dedi ol.
Almaty áýejaıynda ótken apta eski termınaldy rekonstrýktsııalaý jumystary bastalǵan. Bul máselege toqtalǵan mekeme basshysy Goker Kose eski termınaldy jóndeý jumystary 2025 jyldyń qazan aıyna deıin aıaqtalatynyn atap ótti.
– Osy aptada biz eski termınaldy rekonstrýktsııalaý baǵdarlamasyn bastadyq. Eski termınalda júkterdi óńdeýdiń jańa júıesin ornatý, tirkeý bólmelerin keńeıtý, jańa qaýipsizdik jabdyqtaryn ornatý jáne ártúrli aýmaqtardy jańartý jumystary isteledi. Bizdiń ishki reısterimizdiń ótkizý qabileti 6 mıllıon jolaýshyǵa deıin jetedi. Ol búginde 1 mıllıonnan da az, - dedi Goker Kose.
Sondaı-aq áýejaı prezıdenti jańa ushý-qoný jolaǵy 2027-2028 jyldarǵa qaraı salynatynyn aıtty. Búgingi kúni áýejaıda bir ǵana ushý-qoný jolaǵy bar.
