Almaty áýejaıyndaǵy jaǵdaı: qylmystyq is prokýratýraǵa qaıta joldandy
ALMATY. KAZINFORM — Almaty qalasy Túrksib aýdandyq soty B.-ǵa qatysty sotqa deıingi jedeldetilgen is júrgizý isin jalpy tártipte sotqa deıingi tergep-tekserý úshin prokýrorǵa qaıtardy.
Sotta kúdiktige qatysty QK-niń 293-babynyń 3-bóligi, 261-baby, 2-bóligi, 4-tarmaǵy, 273-baby boıynsha sotqa deıingi jedeldetilgen tergep-tekserý hattamasymen qylmystyq is qaraldy.
Sotta belgili bolǵanyndaı, osy jyldyń 7 naýryzynda kúdikti áýejaıdyń ekinshi qabatynda ornalasqan jolaýshylardy tirkeý zalyna kirip, odan ári reıs kútý zalyna ótý úshin reıs aldyndaǵy tekserý kassasyna barǵan.
Otyrǵyzý talonyn jáne odan ári ótý úshin jeke basyn kýálandyratyn talaptarǵa jaýap retinde B. kúzet ınspektory M.-nyń shashynan ustap alyp, pyshaǵyn sýyryp alyp, ony qarsy qoldanamyn dep qorqytyp, onyń jolyn kespeýdi talap etip, kepilge alynǵan adammen birge ushý aımaǵyna odan ári ótý úshin qaýipsizdik ústeline qaraı jyljı bastaıdy.
Sonymen birge, polıtsııa qyzmetkerlerine tapanshalaryn laqtyryp, oǵan jaqyndaý týraly nusqaýyn oryndamaı, kepilge alǵan adamdy pyshaqtaımyn dep jáne áýejaıdy jaryp jiberemin dep qorqytqan.
Sottalýshy QK-niń 261-babynyń 2-bóliginiń 4-tarmaǵymen taǵylǵan aıyp boıynsha kinásin moıyndamaı, eshqandaı talap qoımaǵanyn, tek áýejaıdyń kútý zalyna barǵysy kelgenin túsindirdi.
Bul isti sotta qaraýǵa kedergi bolǵan jáne isti jalpy tártipte sotqa deıingi tergep-tekserý úshin prokýrorǵa qaıtarýǵa negiz boldy.
Osylaısha, Qylmystyq is júrgizý kodeksiniń 190-babynyń 6-bóliginiń 4) tarmaǵynyń talaptaryna sáıkes, kinásin moıyndamaǵan jaǵdaıda sotqa deıingi jedeldetilgen tergeý júrgizilmeıdi.
Qylmystyq protsestik kodekstiń 323-babyna sáıkes sotqa deıingi jedeldetilgen is júrgizý isteri boıynsha basty sot talqylaýynda qylmystyq is júrgizý zańnamasynyń eleýli buzýshylyqtary anyqtalǵan kezde sot olardy joıý úshin isti prokýrorǵa qaıtarady.
Eske salaıyq, búgin sot otyrysy barysynda boıjetkenniń ornyna ózin kepilge usynǵan Musa Ábdiraıymov jábirlenýshi retinde jaýap berýden bas tartqan edi.
Buǵan deıin Almaty áýejaıynda bolǵan oqıǵaǵa qatysty úsh qylmystyq is qozǵalǵanyn jazǵanbyz.
Eske salaıyq, 7 naýryz kúni Almaty áýejaıynda er adam qyzdy kepilge alyp, kópshilik aldynda pyshaq kezengenin jazǵanbyz.
Musa Ábdiraıym kúdiktige ózin kepilge usynyp, qyzmetkerdiń ornyna turǵan. Er adam tártip saqshylarymen kelissózge alańdaǵan tusta ol kúdiktiniń qolyndaǵy pyshaqty julyp aldy.
Memleket basshysynyń Jarlyǵymen qıyn-qystaý jaǵdaıda kórsetken erligi men janqııarlyǵy úshin Musa Saıranbaıuly Ábdiraıym «Erligi úshin» medalimen nagradtaldy.
Keıin Kóliktegi polıtsııa departamenti Almaty áýejaıynda qyzdy kepilge alǵan er adamdy ustaýǵa qatysqan qyzmetkerler boıynsha túsinik berdi.