Almaty áýejaıyndaǵy reıs daýǵa ulasty: jolaýshylar borttan túsirildi

ALMATY. KAZINFORM —   1 maýsym kúni FlyArystan áýe kompanııasynyń Almaty – Shymkent baǵytyndaǵy reısi keshigip, janjalmen aıaqtaldy, dep jazdy Kazinform agenttiginiń menshikti tilshisi. 

Kompanııanyń málimetinshe, Almaty áýejaıyndaǵy joǵary júktemege baılanysty birneshe reıs keıinge shegerilgen. Sonyń ishinde №7107 reısti oryndaýǵa daıyn turǵan ushaqqa qosymsha janarmaı quıý qajet boldy.

Alaıda reıstiń ushpaı uzaq turýyna jolaýshylardyń biri sebep bolǵan. Kompanııanyń baspasóz qyzmeti málimdegendeı, ol azamat sapardan bas tartyp, ózin destrýktıvti túrde ustaǵan. Nátıjesinde ushaq eki saǵattan astam kidirip, barlyq jolaýshylar borttan shyǵarylyp, qaýipsizdik sharalary qaıta ótkizilgen.

— Avıatsııalyq qaýipsizdik talaptaryna sáıkes, jolaýshylardyń barlyǵy ushaqtan túsirildi, sodan keıin áýe kemesine tolyq tekserý júrgizildi. Kútip turǵan jolaýshylarǵa sý jáne tamaq vaýcherleri usynyldy. FlyArystan kompanııasy úshin qaýipsizdik – basty basymdyq. Barlyq belgilengen erejeler qatań saqtalady, — delingen resmı habarlamada.

Reıs aqyry shamamen saǵat 18:00-de ushty.

Buǵan deıin áleýmettik jelide oqıǵanyń kýágerleri borttaǵy uzaq kútýden keıin janjal týyndap, keıbir jolaýshylardyń polıtsııa bólimine jetkizilgenin habarlaǵan bolatyn.

Aıta keteıik, buǵan deıin de FlyArystan áýe kompanııasy Astana – Shymkent reısiniń keshigýine baılanysty túsinikteme bergen edi.

Eske sala keteıik, FlyArystan áýe bıletterin satý kezinde tranzaktsııa úshin komıssııa alyp otyrǵanyn jazǵan edik.