Almaty áýejaıyndaǵy oqys oqıǵa: jolaýshylar mańyna qubyr qulaǵan
ALMATY. KAZINFORM — Almaty qalasynyń áýejaıynda oqys oqıǵa boldy.
Almaty halyqaralyq áýejaıynyń ishki reısterge arnalǵan termınalynda jeldetý júıesiniń temir tirekteri qulaǵany týraly aqparat tarady. Bul jaǵdaıǵa qatysty áýe aılaǵynyń baspasóz qyzmeti túsinikteme berdi.
— Injenerlik júıelerdi montajdaý jumystary barysynda jeldetý elementi jartylaı ajyrap qaldy. Qubyr aldyn ala bekitilip, keıin ony qajetti deńgeıge deıin kezeń-kezeńimen túsirip, qaıta bekitý josparlanǵan bolatyn. Alaıda qubyrdy túsirý barysynda ol ajyrap, sonyń saldarynan konstrýktsııa saqtandyrý arqandaryna ilinip qaldy, — delingen málimdemede.
Sondaı-aq Almaty áýejaıy oqıǵa saldarynan zardap shekkender joq ekenin atap ótti. Qazirgi ýaqytta jeldetý qubyrynyń barlyq elementteri tolyqtaı alynyp tastalǵan. Odan bólek jolaýshylar qaýipsizdigin qamtamasyz etý úshin shuǵyl túrde qosymsha sharalary qabyldanǵan.
— Іshki termınaldaǵy qurylys jumystary áýejaı ınfraqurylymyn jańǵyrtý aıasynda júrgizilgen bolatyn. Jolaýshylardan keltirilgen qolaısyzdyqtar úshin keshirim suraımyz. Qazirgi ýaqytta jaǵdaı tolyq baqylaýda. Barlyq qajetti sharalar qabyldandy, áýejaı qaýipsizdik talaptary men qoldanystaǵy reglamentterdi saqtaı otyryp, shtattyq rejımde jumys istep jatyr, — dep habarlady áýejaıdan.
Eske salaıyq, buǵan deıin Nurlybek Nálibaev Almaty áýejaıyn jańǵyrtý qarqynyn synǵa aldy.
