Almaty áýejaıyndaǵy oqıǵadan keıin basshylyqqa shara qoldanyldy
ASTANA. KAZINFORM — ️Almaty halyqaralyq áýejaıynyń termınalyn sý basýyna baılanysty sharalar qabyldandy, dep habarlaıdy Kólik mınıstrliginiń baspasóz qyzmeti.
Kólik mınıstrliginiń basshylyǵy Almaty halyqaralyq áýejaıynyń ákimshiligimen jáne quqyq qorǵaý organdarymen birlesip, termınal shatyrynyń sý basý faktisine baılanysty shuǵyl keńes ótkizdi.
Azamattyq avıatsııa komıteti áýejaıdy QR Ákimshilik quqyq buzýshylyq týraly kodeksine sáıkes ákimshilik jaýapkershilikke tartty. Áýejaı basshysy tehnıkalyq máselelerge jetekshilik etetin aǵa vıtse-prezıdent Mehmet Gıýzelge tártiptik jaza qoldanylǵanyn habarlady.
Áýejaı jolaýshylardan keltirilgen qolaısyzdyqtar úshin keshirim surady.
— Qazir anyqtalǵan kemshilikterdi joıý boıynsha sharalar kúsheıtilip, barlyq qajetti jumys jedel rejımde júrgizilip jatyr. Jumystardy aıaqtaý jáne sý basý sebepterin tolyq joıý 6 aı ishinde josparlanyp otyr, — delingen habarlamada.
Kólik mınıstrligi mundaı buzýshylyqtar aldaǵy ýaqytta dereý toqtatylatynyn, azamattyq avıatsııa salasyndaǵy zańnama talaptarynyń saqtalýyna jáne avıatsııalyq ınfraqurylym nysandarynyń úzdiksiz jumys isteýine qatań baqylaý qamtamasyz etiletinin málimdeıdi.
Eske salsaq, 3 mamyrda Almaty áýejaıynda nóser jaýynnan keıin shatyrdan sý aǵyp, nysannyń keı aımaqtaryn sý basty.
