Almaty áýejaıyndaǵy oqıǵa: sot birneshe kúnge shegerildi

ALMATY. KAZINFORM — Almatyda áýejaı qyzmetkerin kepilge alǵan er adamǵa qatysty sot otyrysy ótti.

Sot qysqartylǵan tártippen ótip jatyr. Aıyptalýshy is boıynsha jınalǵan derekterdi joqqa shyǵarmady jáne prokýrordyń aıyptaý aktilerimen kelisti. Alaıda jaýap alý kezinde aıyptalýshy Mashrapbek Baratov áýejaıda eshkimdi kepilge alýǵa nıeti bolmaǵanyn jáne eshqandaı talap qoımaǵanyn málimdedi.

— Eshkimdi kepilge alý týraly oıym bolǵan joq, áýejaıǵa kirgim de kelmegen. Áýejaı aldynda dúken boldy, soǵan kirip, birnárse alǵym keldim. Keıin áýejaıdyń ishin aralap qaıtaıyn dedim, — dedi ol.

Sýdıa 9 sáýir 10:30–ǵa deıin sot otyrysynda úzilis jarııalady.

Buǵan deıin sotta áýejaıdaǵy oqıǵaǵa qatysty tyń derekter aıtylǵanyn jazǵanbyz. Kúdiktige qatysty qylmystyq kodekstiń úsh baby boıynsha aıyp taǵylyp otyr: kepilge alý, qarý qoldaný arqyly jasalǵan buzaqylyq, terrorızm aktisi týraly kórineý jalǵan habarlaý. 

Eske salaıyq, 7 naýryz kúni Almaty áýejaıynda er adam qyzdy kepilge alyp, kópshilik aldynda pyshaq kezengenin jazǵanbyz. 

Musa Ábdiraıym kúdiktige ózin kepilge usynyp, qyzmetkerdiń ornyna turǵan. Er adam tártip saqshylarymen kelissózge alańdaǵan tusta ol kúdiktiniń qolyndaǵy pyshaqty julyp aldy.