Almaty áýejaıyndaǵy oqıǵa: is qaıta sotqa joldandy

ALMATY. KAZINFORM – Kóliktegi polıtsııa departamenti Almaty áýejaıynda adamdy kepilge alý isi boıynsha qaıta tergeýdiń qorytyndysyn habarlady.

Bıyl 7 sáýir kúni Túrksib aýdandyq sotynda Almaty áýejaıynda qyzmetkerdi kepilge alǵan Mashrapbek Baratovqa qatysty sot otyrysy bastaldy.

Sotta kúdiktige qatysty QK-niń 293-babynyń 3-bóligi, 261-baby, 2-bóligi, 4-tarmaǵy, 273-baby boıynsha sotqa deıingi jedeldetilgen tergep-tekserý hattamasymen qylmystyq is qaraldy. Alaıda sottalýshy QK-niń 261-babynyń 2-bóliginiń 4-tarmaǵymen taǵylǵan aıyp boıynsha kinásin moıyndamady. Sondyqtan Túrksib aýdandyq soty kúdiktige qatysty sotqa deıingi jedeldetilgen is júrgizý isin jalpy tártipte sotqa deıingi tergep-tekserý úshin prokýrorǵa qaıtardy.

Kóliktegi polıtsııa departamentiniń málimetinshe, qosymsha sotqa deıingi tergep-tekserý Mashrapbek Baratovtyń qylmystyq áreketine qatysty aıyptaýdy ózgerissiz qaldyrdy.

- Sotqa deıingi tergep-tekserý barysynda M.Abdraım QR Qylmystyq-protsestik kodeksiniń 71-babyna sáıkes jábirlenýshi dep tanyldy. Qylmystyq is boıynsha tergeý aıaqtalyp, is sotqa joldandy, - dep habarlady departamentten.

Eske salaıyq, buǵan deıin Almaty áýejaıynda qyzmetkerdi kepilge alǵan aıyptalýshyǵa qatysty istiń qandaı satyda ekenin jazǵanbyz.

Eske salaıyq, 7 naýryz kúni Almaty áýejaıynda er adam qyzdy kepilge alyp, kópshilik aldynda pyshaq kezendi.

Musa Ábdiraıym kúdiktige ózin kepilge usynyp, qyzmetkerdiń ornyna turǵan. Er adam tártip saqshylarymen kelissózge alańdaǵan tusta ol kúdiktiniń qolyndaǵy pyshaqty julyp aldy.