Almaty áýejaıyndaǵy oqıǵa: prokýror 10,5 jyl bas bostandyǵynan aıyrýdy surady
ALMATY. KAZINFORM — Almaty áýejaıynda adamdy kepilge alý isi boıynsha sot otyrysynda jaryssóz ótti.
Sot otyrysynda aldymen is boıynsha jábirlenýshilerden jaýap alyndy.
Jábirlenýshi Botagóz Muhtarova 2025 jylǵy 7 naýryz kúni tekserý qyzmetiniń ınspektory retinde jumysqa shyqqanyn aıtty. Onyń sózinshe, tekserý beketine kelgen M.Baratovtan jeke kýáligi men ushaqqa otyrǵyzý talonyn suraǵanda, ol «úsh mınýttan soń áýejaıdy jaryp jiberemin» dep qorqytqan.
— Ol oń jaq qaltasynan pyshaq alyp shyqty. Men aıqaılap, áriptesterimdi kómekke shaqyrdym. Ol eshkim jaqyndamasyn, áýejaıdy jaryp jiberemin dedi. Shok kúıinde boldym. Sol kezde polıtseıler, jolaýshylar men áriptesterim keldi. Basymdy kótergende, janymda Musa Ábdiraıym tur eken. Ol «qyzdy jiber, ornyna meni al» dedi. Sodan keıin Baratov meni bosatty, — dedi jábirlenýshi.
Odan keıin jábirlenýshi Musa Ábdiraıym oqıǵa qalaı bolǵanyn aıtty. Ol áýejaıǵa tanystaryn shyǵaryp salýǵa kelgeninde aıqaı-shý estilgenin atap ótti.
— Qyz qatty aıqaılap jatty. Baratovtyń ne isterin bilmeı turǵany baıqaldy. Eger bári solaı jalǵasa berse, birdeńe bolatynyn sezdim. Sol kezde men odan qyzdyń ornyna meni alýyn suradym. Ol meni kepilge aldy. Sol sátte eshkim zardap shekpeıtin jol izdedim. Qolaıly sátte pyshaqty tartyp aldym, — dedi Musa Ábdiraıym.
Sodan keıin sottalýshynyń ózi sóz alyp, bul áreketke ómirindegi qıyn jaǵdaılar, otbasyndaǵy janjal jáne kúızelis áser etkenin aıtty.
— Eki-úsh kún buryn basshylyqpen jalaqy keshigip jatqany úshin ursysyp qalǵanmyn. Sol kúızelistiń áserinen áýejaıǵa keldim. Qyz bılet qaıda dep surady. Men «2-3 mınýtqa kirip shyǵamyn» dedim. Artyma burylǵanda ol meni jaǵamnan ustady ma, bilmeımin, sol sátte basyma birdeńe boldy, — dedi sottalýshy.
Ol pyshaqty rasymen alyp shyqqanyn moıyndady. Biraq eshqandaı talap qoımaǵanyn, tek kútý zalyna kirip, jaǵdaıǵa kóz júgirtkisi kelgenin aıtty. Alaıda áýejaıdy jaryp jiberemin dep nege qorqytqanyn túsindire almady.
Sýdıa Anar Qarasheva tergeý aıaqtalǵanyn jarııalap, taraptardyń jaryssózine kóshti.
Prokýror Almas Bertaev sottalýshynyń kinási jábirlenýshiler men kýágerlerdiń aıǵaqtary, sondaı-aq beınejazbalar arqyly tolyq dáleldengenin málimdedi.
Ol Mashrapbek Baratovty kináli dep tanyp, kelesi jazany taǵaıyndaýdy surady:
- «Kepilge alý» baby boıynsha — 8 jyl;
- «Qarý qoldaný arqyly buzaqylyq» baby boıynsha — 4 jyl 8 aı;
- «Terrorıstik akt týraly kórineý jalǵan aqparat taratý» baby boıynsha — 2 jyl 6 aı;
- Barlyq jazalardy jıyntyqtap, aqyrǵy jaza retinde 10 jyl 6 aı bas bostandyǵynan aıyrýdy usyndy.
Sońǵy sózinde Mashrapbek Baratov jábirlenýshilerden keshirim surap, jasaǵan isine ókinetinin jetkizdi. Sondaı-aq sottan óziniń zeınet jasta ekenin eskerýdi surady.
Úkim 16 shilde kúni saǵat 16:00–de jarııalanady.
Buǵan deıin Almaty áýejaıynda adamdy kepilge alý isi boıynsha sot qaıta bastalǵanyn jazǵanbyz.
Eske salaıyq, bıyl 7 sáýir kúni Túrksib aýdandyq sotynda Almaty áýejaıynda qyzmetkerdi kepilge alǵan Mashrapbek Baratovqa qatysty sot otyrysy bastaldy.
Sottalýshy QK-niń 261-babynyń 2-bóliginiń 4-tarmaǵymen taǵylǵan aıyp boıynsha kinásin moıyndamady. Sondyqtan Túrksib aýdandyq soty kúdiktige qatysty sotqa deıingi jedeldetilgen is júrgizý isin jalpy tártipte sotqa deıingi tergep-tekserý úshin prokýrorǵa qaıtardy.
Aıta keteıik, 7 naýryz kúni Almaty áýejaıynda er adam qyzdy kepilge alyp, kópshilik aldynda pyshaq kezendi.
Musa Ábdiraıym kúdiktige ózin kepilge usynyp, qyzmetkerdiń ornyna turǵan. Er adam tártip saqshylarymen kelissózge alańdaǵan tusta ol kúdiktiniń qolyndaǵy pyshaqty julyp aldy.