Almaty áýejaıyndaǵy oqıǵa: prokýratýraǵa qaıtarylǵan is qandaı satyda
ALMATY. KAZINFORM — Kazinform agenttigi Almaty áýejaıynda qyzmetkerdi kepilge alǵan aıyptalýshyǵa qatysty istiń qandaı satyda ekenin surap Bas kólik prokýratýrasyna saýal joldady.
Bıyl 7 sáýir kúni Túrksib aýdandyq sotynda Almaty áýejaıynda qyzmetkerdi kepilge alǵan Mashrapbek Baratovqa qatysty sot otyrysy bastaldy.
Sotta kúdiktige qatysty QK-niń 293-babynyń 3-bóligi, 261-baby, 2-bóligi, 4-tarmaǵy, 273-baby boıynsha sotqa deıingi jedeldetilgen tergep-tekserý hattamasymen qylmystyq is qaraldy. Alaıda sottalýshy QK-niń 261-babynyń 2-bóliginiń 4-tarmaǵymen taǵylǵan aıyp boıynsha kinásin moıyndamady. Sondyqtan Túrksib aýdandyq soty kúdiktige qatysty sotqa deıingi jedeldetilgen is júrgizý isin jalpy tártipte sotqa deıingi tergep-tekserý úshin prokýrorǵa qaıtardy.
Kazinform saýalyna jaýap bergen Bas kólik prokýratýrasy istiń sottan prokýratýraǵa áli túspegenin habarlady.
— 2025 jylǵy 7 naýryzda M.Baratov qatysty buzaqylyq, adamdy kepilge alý jáne terrorızm aktisi týraly kórineý jalǵan habarlama faktileri boıynsha (QK 293-bap 3-bólim, 261-bap 2-bólim 4-tarmaq, 273-bap) sotqa deıingi tergep-tekserý tirkeldi. 22 naýryzda is kúdiktiniń kinásin tolyq moıyndaýyna baılanysty jedeldetilgen sotqa deıingi tergep-tekserý tártibimen Túrksib aýdandyq sotyna qaraý úshin joldandy. Alaıda, basty sot talqylaýy barysynda aıyptalýshy M.Baratov óz kinásin ishinara moıyndamaýyna baılanysty, is sotpen prokýrorǵa qaıtaryldy. Qazirgi ýaqytta is sottan prokýratýraǵa kelip túsken joq. Sotqa deıingi tergep-tekserý materıaldary kelip túskennen keıin túpkilikti protsestik sheshim qabyldanatyn bolady, — delingen Bas kólik prokýrorynyń birinshi orynbasary Sáken Jorabekovtyń jaýabynda.
Sondaı-aq Bas kólik prokýratýrasy jaýabynda QR Qylmystyq kodeksiniń 29-babyna sáıkes, qylmystyq isterdi qaraýdyń ashyqtyǵyn aıqyndaý sottyń ókilettiginde ekeni jáne jaza mólsherin belgileý máselesi tek sottyń aıryqsha quzyretine jatatyny aıtylǵan.
Eske salaıyq, 7 naýryz kúni Almaty áýejaıynda er adam qyzdy kepilge alyp, kópshilik aldynda pyshaq kezengenin jazǵanbyz.
Musa Ábdiraıym kúdiktige ózin kepilge usynyp, qyzmetkerdiń ornyna turǵan. Er adam tártip saqshylarymen kelissózge alańdaǵan tusta ol kúdiktiniń qolyndaǵy pyshaqty julyp aldy.
Memleket basshysynyń Jarlyǵymen qıyn-qystaý jaǵdaıda kórsetken erligi men janqııarlyǵy úshin Musa Saıranbaıuly Ábdiraıym «Erligi úshin» medalimen nagradtaldy.
Keıin Kóliktegi polıtsııa departamenti Almaty áýejaıynda qyzdy kepilge alǵan er adamdy ustaýǵa qatysqan qyzmetkerler boıynsha túsinik berdi.