Almaty áýejaıyndaǵy oqıǵa: Musa Ábdiraıym Búkilálemdik boks keńesiniń beıbitshilik elshisi boldy
ASTANA. KAZINFORM – Almaty halyqaralyq áýejaıynda kepilge alynǵan qyzmetkerdi erlikpen qutqaryp qalǵan Musa Ábdiraıym Búkilálemdik boks keńesiniń (WBC) beıbitshilik elshisi bolyp taǵaıyndaldy.
Bul týraly WBC uıymynyń prezıdenti Hose Sýleıman áleýmettik jelidegi paraqshasynda jarııalady.
Hose Sýleıman qazaqstandyq Álıhan Jarylǵapov arqyly erlik kórsetken Musa Ábdiraıymmen telefon arqyly sóılesip, onyń is-áreketin joǵary baǵalady. Sonymen qatar, ony resmı túrde uıymnyń beıbitshilik elshisi dep jarııalady.
- Men onymen qatar turǵanymdy maqtan tutamyn. Sport úshin ǵana emes, adamzat úshin naǵyz batyr, - dedi uıym basshysy.
Osyǵan deıin Almaty áýejaıynda jolaýshy qyzmetkerdiń shashynan tartyp, kópshilik aldynda pyshaq kezengeni týraly jazdyq.
Іshki reıster termınalynda er adam jolaýshy retinde ushý aldyndaǵy tekserý aımaǵyna barǵan. Avıatsııalyq qaýipsizdik qyzmetkerleri er adamnan qujattardy kórsetýdi suraǵan, al ol áýejaı qyzmetkerin shashynan ustap, pyshaqpen qorqytqan.
Keıinirek Prezıdent Musa Ábdiraıymdy «Erligi úshin» medalimen nagradtady.