Almaty áýejaıyndaǵy oqıǵa: advokat sottan Ábdiraıymdy jábirlenýshi dep tanýdy surady
ALMATY. KAZINFORM - Sot otyrysy Túrksib aýdandyq sotynda ótip jatyr. Áýejaıda boıjetkenniń ornyna ózin kepilge usynǵan Musa Ábdiraıymov sotta jábirlenýshi retinde jaýap berýden bas tartty.
Advokat Damır Sálimovtan sotqa qorǵaýyndaǵy Musa Ábdiraıymdy jábirlenýshi dep taný týraly ótinishhat kelip túsken.
Onyń paıymdaýynsha, Ábdiraıym kepilge alynǵan, ómirine qaýip tóngen, biraq odan is boıynsha jaýap alynbaǵan.
Alaıda, sot Musa Ábdiraıymnyń ózinen de ótinish túskenin málimdedi.
— Jábirlenýshi bolmaǵandyqtan, advokat Sálimovtiń buryn bergen ótinishin meniń múddem úshin qaramaýyńyzdy suraımyn. Mende eshqandaı shaǵym nemese aryz joq. Maǵan eshqandaı zııan tıgen joq, men jábirlenýshi bolýdan bas tartamyn. Óıtkeni men qyzdy sanaly túrde qutqaryp qaldym jáne muny jábirlenýshi bolý úshin istemedim, - dep jazylǵan Ábdiraıymnyń ótinishin sýdıa oqyp berdi.
Buǵan deıin Almaty áýejaıynda bolǵan oqıǵaǵa qatysty úsh qylmystyq is qozǵalǵanyn jazǵanbyz.
Eske salaıyq, 7 naýryz kúni Almaty áýejaıynda er adam qyzdy kepilge alyp, kópshilik aldynda pyshaq kezengenin jazǵan edik.
Musa Ábdiraıym kúdiktige ózin kepilge usynyp, qyzmetkerdiń ornyna turǵan. Er adam tártip saqshylarymen kelissózge alańdaǵan tusta ol kúdiktiniń qolyndaǵy pyshaqty julyp aldy.
Memleket basshysynyń Jarlyǵymen qıyn-qystaý jaǵdaıda kórsetken erligi men janqııarlyǵy úshin Musa Saıranbaıuly Ábdiraıym «Erligi úshin» medalimen nagradtaldy.
Keıin Kóliktegi polıtsııa departamenti Almaty áýejaıynda qyzdy kepilge alǵan er adamdy ustaýǵa qatysqan qyzmetkerler boıynsha túsinik berdi.