Almaty áýejaıyndaǵy barlyq halyqaralyq reıster jańa termınalǵa aýystyryldy
ALMATY. KAZINFORM — Barlyq halyqaralyq reıs Almaty áýejaıynyń jańa termınalynan júzege asyrylmaq.
«14 maýsym saǵat 1:00-den bastap barlyq halyqaralyq reıstiń Almaty áýejaıynyń jańa termınalynan ushýǵa tolyq kóshýi júzege asyryldy. 2024 jyldyń 1 maýsymynan bastap qazirgi ýaqytqa deıin jańa termınaldan barlyǵy 310 halyqaralyq reıs oryndaldy jáne 43 814 jolaýshylarǵa qyzmet kórsetildi», - delingen habarlamada.
Búgingi tańda jańa termınal 33 áýe kompanııaǵa qyzmet kórsetedi.
«Onyń ishinde úsh qazaqstandyq tasymaldaýshy – Air Astana, Scat, FlyArystan áýe kompanııalary jáne Uzbekistan Airways, Azerbaijan Airlines, Pegasus Airlines, Somon Air, Wizz Air, Vietjet, Red Wings, IndiGo, Loong Air, Rossiya, Jazeera Airways, Salam Air, Air Arabia, Red Sea Airlines, Air Cairo, Hunnu Air, Azimuth Aero, Yakutia Airlines, Qeshm Air, Air Asia, S7 airlines, FlyNas, Neos Airlines, China Southern Airlines, Qatar Airways, Lufthansa, Flydubai, Turkish Airlines, Asiana Airlines, Aeroflot sııaqty 30 Halyqaralyq áýe kompanııalar bar», - dep atap ótti Azamattyq avıatsııa komıtetinen.
Burynǵy termınalda (T1) barlyq ishki baǵyttar boıynsha Air Astana, Scat, FlyArystan, Qazaq air jáne ıÝjnoe nebo áýe kompanııalarynyń reısteri ushady.
Almaty áýejaıynyń jolaýshylary men qonaqtarynyń jaılylyǵy men yńǵaılylyǵyn qamtamasyz etý úshin T1 termınalyn qaıta jańartý jáne turaq aımaǵyn ulǵaıtý maqsatynda jóndeý-qurylys jumystary bastaldy.
Osyǵan deıin áleýmettik jelide Almaty áýejaıynyń jańa termınaly jumys istemeı turǵany týraly aqparat taraǵan bolatyn. Keıin Kazinform tilshisi máseleniń mán-jaıyn anyqtap kórdi.
