Almaty áýejaıynda júk perrony men jańa termınal arasy jalǵandy

ALMATY. KAZINFORM – Almaty halyqaralyq áýejaıynyń L1 perronynda jańa rýldeý marshrýtynyń qurylysy aıaqtalyp, paıdalanýǵa berildi.

Jańa marshrýt Halyqaralyq termınal perrony men júk perronyn sapaly jol jabynymen baılanystyrady.

— Atalǵan jańa marshrýt jolaýshylar men júk reısterine qyzmet kórsetý jyldamdyǵy men operatsııalyq tıimdilikti edáýir arttyrady. Bul áýejaı ınfraqurylymyn jańǵyrtýdyń aýqymdy josparynyń alǵashqy kezeńi ǵana. Aldaǵy aılarda júzege asyrylatyn basqa da iri jobalar áýejaı múmkindikterin odan ári keńeıtedi, — dep habarlady Almaty áýejaıy.

Jańa jol 6 qarasha kúni resmı túrde paıdalanýǵa berilgen. Ony alǵashqy bolyp Kýala-Lýmpýrden kelgen AirAsia áýekompanııasy paıdalandy.

Eske salaıyq, buǵan deıin Almaty halyqaralyq áýejaıyn basqarýshy TAV Airports kompanııasy áýe aılaǵyn 2050 jylǵa deıin damytýdyń bas josparyn tanystyrdy.

Almaty halyqaralyq áýejaıynyń prezıdenti Goker Koseniń aıtýynsha, áýe aılaǵyna 2050 jylǵa deıin 5 kezeń boıynsha ınvestıtsııa salynady. 2025-2028 jyldar aralyǵyndaǵy birinshi kezeńde áýejaı ınfraqurylymyna 362 mln AQSh dollary jumsalmaq. Onyń aıasynda 130 joba iske asyrylady.