Almaty áýejaıynda janjal shyǵarǵandarǵa qatysty is qozǵaldy
ALMATY. KAZINFORM – Almaty áýejaıynda reısi keshikken azamattar janjal shyǵardy. Oqıǵanyń beınejazbasy áleýmettik jelide tarady.
FlyArystan áýe kemesi «Almaty – Astana» baǵytynda saǵat 09:05 ushýy kerek bolǵan. Alaıda júıedegi tehnıkalyq aqaýǵa baılanysty jolaýshylarǵa aldymen reıstiń 10:55-ke aýysqany týraly, odan keıin 09:25-te ushatyny týraly eskertý habarlama kelgen. Oqıǵa saldarynan biraz jolaýshy reıske minip úlgermeı qalǵan.
Ýaqytyly ushyp kete almaǵan jolaýshylar áýe kompanııasynyń tirkeý ústelinde shý shyǵaryp, birneshe zatty qıratqan. Atalǵan jaǵdaıǵa baılanysty Kóliktegi Polıtsııa departamenti túsinikteme berdi.
«Áýekompanııa qyzmetkerleri polıtsııaǵa aryzben júgindi. Tekserý kezinde 31 jastaǵy áıeldiń ózin dóreki ustap, áýekompanııa qyzmetkerlerine beıádep sóz aıtqany anyqtaldy. Sonymen qatar, ol tirkeý ústelindegi monıtordy zaqymdaǵan. Áıelge qatysty kólik polıtseıleri usaq buzaqylyq jáne bótenniń múlkin qasaqana joıý nemese búldirý boıynsha ákimshilik is qozǵady. Jınalǵan materıaldar sotqa jiberedi», - dep habarlady departamenttiń baspasóz qyzmetinen.
