Almaty áýejaıynda urlyqtan keıin baqylaýǵa alynbaǵan aýmaqtarǵa kamera qoıyldy
ASTANA. KAZINFORM — Jyl basynan beri Іshki ister mınıstrliginiń tergeýshileri men anyqtaýshylary memlekettik organdar men uıymdardyń atyna 51 myńǵa jýyq usyný engizdi. Sonyń nátıjesinde Almaty áýejaıyndaǵy beınebaqylaýdyń «soqyr aımaqtary» kameralarmen jabdyqtalyp, el boıynsha eki myńǵa jýyq jańa kamera ornatylyp, jol qaýipsizdigi kúsheıtildi.
ІІM málimetinshe, bul jumystar «Zań men tártip» qaǵıdaty aıasynda qaýipsiz áleýmettik orta qalyptastyrý jáne qoǵamda quqyq buzýshylyqqa múldem tózbeýshilik mádenıetin ornyqtyrý maqsatynda júrgizilip jatyr.
"Qylmystyń aldyn alýdyń negizgi tetikteriniń biri — Qylmystyq-protsestik kodekstiń 200-babynda kózdelgen usyný engizý ınstıtýty. Usynýlar qylmystyq is barysynda anyqtalǵan zań buzýshylyqtar, memlekettik organdar men uıymdar qyzmetindegi kemshilikter jáne quqyq buzýshylyqtardyń jasalýyna yqpal etken ózge de sebepter negizinde engiziledi", - dep habarlady vedomstvo.
Jyl basynan beri ishki ister organdary ákimdikterge, jergilikti atqarýshy organdarǵa, avtojoldarǵa jaýapty uıymdarǵa, bilim jáne densaýlyq saqtaý mekemelerine, ekinshi deńgeıli bankterge, kásipkerlik sýbektilerine, óndiristik kásiporyndarǵa, múlik ıeleri birlestikterine jáne mınıstrlikterge 51 myńǵa jýyq usynys joldaǵan.
Sonyń nátıjesinde áleýmettik jaǵdaıy qolaısyz aýdandarda, saýda oryndary men oıyn-saýyq mekemelerinde eki myńǵa jýyq beınebaqylaý kamerasy ornatyldy.
Avtojoldardyń 157 apatty ýchaskesinde jaryqtandyrý júıeleri, baǵdarshamdar men jol belgileri qoıylyp, jol tańbalary jańartyldy. 63 nysanda kúzet jáne qaýipsizdik júıeleri kúsheıtildi. Bilim berý uıymdarynda 60-tan astam profılaktıkalyq is-shara uıymdastyryldy. Zańsyz qyzmet kórsetken tórt sýbektiniń jumysy toqtatylyp, 10-nan astam kafe men túngi klýbtyń jumys ýaqytyna shekteý engizildi.
Tergeý barysynda anyqtalǵan quqyq buzýshylyqtar úshin 302 adam ákimshilik jaýapkershilikke tartyldy. Olardyń arasynda alkogol ónimderin zańsyz satqan, tirkeýsiz júrgen, kólik quraldaryn zańsyz basqarǵan jáne mal jaıý qaǵıdalaryn buzǵan azamattar bar.
Mınıstrlik naqty mysaldardy da keltirdi. Almaty halyqaralyq áýejaıynda jolaýshynyń múlki urlanǵannan keıin termınaldaǵy beınebaqylaý qamtymaǵan «soqyr aımaqtar» kameralarmen tolyq jabdyqtaldy. Pavlodarda ınternet-alaıaqtyq faktisi boıynsha tanymal platformadaǵy alaıaq akkaýnttar buǵattalyp, jalǵan habarlandyrýlardy jarııalaý múmkindigi joıyldy. Aqtaýda elektrondyq temekini zańsyz satqan dúkenniń qyzmeti toqtatyldy.
Jol qaýipsizdigine qatysty da birqatar shara qabyldandy. Marqakól — Qaljyr — Omby — Maıqapshaǵaı avtojolynyń 24ó56-shaqyrym aralyǵynda jol tósemi jóndelip, jol tańbalary jańartyldy, al 67-shaqyrymda úsh stroboskop pen jaryq shaǵylystyratyn jol markerleri ornatyldy. Sondaı-aq Aqtóbe oblysyndaǵy Samara — Shymkent respýblıkalyq avtojolynyń 867-shaqyrymynda jyldamdyqty shekteıtin jol belgileri men avtomatty baqylaý kesheni iske qosyldy.
ІІM málimetinshe, engizilgen usynýlardy qaraý nátıjesinde qyzmettik mindetin tıisinshe oryndamaǵany úshin 3 myńǵa jýyq laýazymdy tulǵa tártiptik, al 700-den astam adam ákimshilik jaýapkershilikke tartylǵan.
Eske salaıyq, buǵan deıin Astanadaǵy kameralar 40 myńnan astam quqyqbuzýshylyqty anyqtaǵanyn habarlaǵan edik.
