Almaty áýejaıynda táýligine 370 tonna júk óńdeledi
ALMATY. KAZINFORM – Almaty halyqaralyq áýejaıynda óńdeletin júk kólemi aıtarlyqtaı artady.
Nysandy basqaratyn kompanııa málimetinshe, 2026 jyly áýejaıdyń júk kesheni orta eseppen táýligine shamamen 370 tonna, aptasyna 2 850 tonna jáne aıyna 11 600 tonna júk óńdeıdi. Jyldyq júk kólemi shamamen 137 000 tonnaǵa jetedi dep boljanyp otyr.
- Júk operatsııalary halyqaralyq standarttarǵa sáıkes júzege asyrylady. Almaty halyqaralyq áýejaıy farmatsevtıkalyq ónimderdi óńdeýge qoıylatyn talaptarǵa sáıkestigin rastaıtyn IATA CEIV Pharma sertıfıkatyna, sondaı-aq Eýropalyq Odaq pen Ulybrıtanııanyń RA3 sertıfıkatyna ıe, - dep habarlady áýe aılaǵynyń baspasóz qyzmeti.
Aldaǵy ýaqytta áýejaıda qosymsha 5 000 m² alań qurylmaq. Bul júk kesheniniń eksporttyq qýatyn eki esege arttyrýǵa múmkindik beredi. 2030 jylǵa qaraı áýejaı jyldyq júk óńdeý kólemin 250 000 tonnaǵa deıin ulǵaıtý josparlanǵan.
Almaty áýejaıynyń ókilderi júk operatsııalarynyń ónimdiligin odan ári arttyrý úshin segizge deıin ULD jumys stantsııasyn qurý jáne 60-tan astam ULD avıatsııalyq júk konteınerleri men palletterin ornalastyrýǵa múmkindik beretin ınfraqurylym qarastyrylǵanyn atap ótti.
Eske salaıyq, Astana áýejaıy tamyzda 1,5 myń tonnadan astam júk óńdedi.
