Almaty áýejaıynda sheteldik jolaýshy «bagajymda bomba bar» degen

ALMATY. KAZINFORM — Jyl basynan beri qoǵamdyq tártipti buzǵany úshin jolaýshylar poıyzdary men áýe kemelerinen 900 adam túsirildi.

Sondaı oqıǵanyń biri 2 qyrkúıekte Almaty áýejaıynyń halyqaralyq reıster tirkeý ornynda boldy. Kórshiles eldiń 18 jastaǵy azamaty ázil retinde bagajynda «atom bombasy» baryn aıtqan. Ol bul áreketimen qoǵamdyq tártip pen azamattardyń tynyshtyǵyn buzdy. Jas jigit usaq buzaqylyq baby boıynsha ákimshilik jaýapkershilikke tartyldy.

Kóliktegi polıtsııa departamentiniń habarlaýynsha, jolaýshylar mundaı áreketterdiń saldary qanshalyqty aýyr bolatynyn kóbine túsine bermeıdi.

Jyl basynan beri túrli quqyq buzýshylyq jasaǵan 900 jolaýshy poıyzdar men ushaqtardan túsirilgen. Onyń 489-y – jolaýshylar poıyzynan, 411-i – áýe kemelerinen.

Eń kóp tirkelgen quqyq buzýshylyqtar – alkogoldi ishimdikterdi ishý jáne qoǵamdyq oryndarda mas kúıinde júrý. Sondaı-aq usaq buzaqylyq, vagonda shylym shegý jáne ózge de zańbuzýshylyqtar tirkelgen.

Kólik polıtsııasy kez kelgen qorqytý nemese kólik quraldarynda jaǵdaıdy ýshyqtyrý áreketteri qaýip tóndiretinin jáne kináliler qoldanystaǵy zańnamaǵa sáıkes jaýapqa tartylatynyn eskertti.

Eske salaıyq, jýyrda Aqtaý áýejaıynda «Aqtaý–Shymkent» reısiniń jolaýshysy ushaqta jarylǵysh zat bar dep habarlap, shamamen 200 adam evakýatsııalanyp, áýe kemesin arnaıy qyzmetter teksergen edi.