Almaty áýejaıynda reıster keshigip jatyr

ALMATY. KAZINFORM – Almaty halyqaralyq áýejaıynda aýa raıyna baılanysty birqatar áýe reısiniń keshiktirilgeni tirkeldi.

Onlaın-tablo derekterine sáıkes, Astanaǵa (úsh reıs), Aqtaýǵa, Qaraǵandyǵa (eki reıs) jáne Máskeýge ushatyn reıster keshigip ushyp jatyr. Sondaı-aq Atyraýdan, Semeıden, Aqtaýdan, Aqtóbeden, Astanadan, Dýbaıdan, Qyzylordadan, Jıddadan, Dohadan, Úrimshiden, Oraldan, Qostanaıdan jáne Chendý qalasynan keletin reısterdiń de keshigýi baıqalady.

Áýejaıdyń baspasóz qyzmetiniń habarlaýynsha, qolaısyz meteorologııalyq jaǵdaılarǵa baılanysty keıbir ushyp shyǵý reısteri keıingi ýaqytqa aýystyrylǵan. Áýe aılaǵynyń barlyq qyzmeti kúsheıtilgen rejımde jumys istep, ushý kestesin múmkindiginshe tez turaqtandyrý úshin qajetti sharalardy qabyldap jatyr.

— Jolaýshylar men ekıpajdyń qaýipsizdigi basty basymdyq bolyp qala beredi, — dep atap ótti áýejaı ókilderi.

Jolaýshylarǵa reısterdiń mártebesin aldyn ala áýe kompanııalarynan naqtylap, áýejaıdyń resmı resýrstaryndaǵy jańartýlardy qadaǵalaý usynylady. Sondaı-aq qonaqtardan ushý kestesindegi ýaqytsha ózgeristerge túsinistikpen qaraý suralady.

Aıta keteıik, Almatyda 15 santımetrden astam qar jaýǵan.