Almaty áýejaıynda ózine ot qoıǵan er adam bul áreketke ne úshin barǵany belgili boldy

ALMATY. KAZINFORM — Almaty áýejaıynda ózin órtemek bolǵan er adamnyń áreketine ne sebep bolǵany aıtyldy.

Aldyn ala málimetke sáıkes, buǵan er adamnyń azamattyq jubaıymen aradaǵy jeke janjaly sebep bolǵan.

— Barlyq mán-jaı tergeý barysynda anyqtalady, — dep habarlady Kóliktegi polıtsııa departamentiniń baspasóz qyzmeti.

Eske salaıyq, keshe, 25 tamyzda Almaty halyqaralyq áýejaıynda bir er adamnyń kassa janynda ózin órtemek bolǵanyn habarlaǵan edik. Polıtseıler der kezinde áreket etip, qaıǵyly jaǵdaıdyń aldyn aldy. Atalǵan fakti boıynsha qylmystyq is qozǵaldy.

Keıinirek bul oqıǵanyń Almaty halyqaralyq áýejaıy jumysyna áser etpegeni belgili boldy.

Almaty Qoǵamdyq densaýlyq saqtaý basqarmasynyń málimetinshe, ol №4 qalalyq klınıkalyq aýrýhananyń jansaqtaý bóliminde jatyr. Jaǵdaıy óte aýyr.