Almaty áýejaıynda ózin órtemek bolǵan er adamǵa qatysty tergeý toqtatyldy

ALMATY. KAZINFORM — Almaty áýejaıynda 33 jastaǵy turǵynnyń ózin órtemek bolǵan áreketine baılanysty bastalǵan qylmystyq tergeý toqtatyldy.

Bul derek boıynsha Qylmystyq kodekstiń 105-babynyń 1-bóligi (Ózin-ózi óltirýge deıin jetkizý, ózin-ózi óltirýge kóndirý nemese ózin-ózi óltirýge yqpal etý) boıynsha sotqa deıingi tergeý júrgizilgen. Aýrýhanadan shyqqannan keıin er adam eshkimge shaǵymy joq ekeni týraly jazbasha ótinish bergen.

— Tergeý barysynda qajetti barlyq is-shara oryndalyp, qylmystyq quqyq buzýshylyq quramynyń bolmaýyna baılanysty is Qylmystyq-protsestik kodekstiń 35-baby 1-bóliginiń 2-tarmaǵy negizinde toqtatyldy. Prokýror bul sheshimdi bekitti, — dep habarlady Kóliktegi polıtsııa departamenti.

Tergeý qorytyndysy boıynsha Almaty áýejaıynyń avıatsııalyq qaýipsizdik qyzmetine osy oqıǵanyń bolýyna áser etýi múmkin kemshilikterdi túzetý týraly resmı usynys jiberildi.

Kóliktegi polıtsııa departamenti tergeýge qatysty basqa aqparat qupııa bolǵandyqtan, jarııa etilmeıtinin málimdedi.

Eske salaıyq, 2025 jylǵy 25 tamyzda Almaty halyqaralyq áýejaıynda bir er adamnyń kassa janynda ózin órtemek bolǵanyn habarlaǵan edik. Polıtseıler der kezinde áreket etip, qaıǵyly jaǵdaıdyń aldyn aldy.

Sol kezdegi Almaty qoǵamdyq densaýlyq saqtaý basqarmasynyń málimetinshe, ol № 4 qalalyq klınıkalyq aýrýhananyń jansaqtaý bólimine jatqyzylǵan, jaǵdaıy óte aýyr ekeni habarlanǵan.

Keıinirek onyń bul áreketke ne úshin barǵany belgili boldy. Buǵan er adamnyń azamattyq nekedegi jubaıymen aradaǵy jeke janjaly sebep bolǵany aıtyldy.