Almaty áýejaıynda ózin órtegen er adamnyń háli qandaı

ALMATY. KAZINFORM — Almaty áýejaıyndaǵy ózin órtemek bolǵan er adamnyń jaǵdaıy belgili boldy.

Bul týraly Almaty Qoǵamdyq densaýlyq saqtaý basqarmasynyń baspasóz qyzmeti habarlady.

Vedomstvonyń málimetinshe, patsıent jedel medıtsınalyq járdem brıgadasymen № 4 qalalyq klınıkalyq aýrýhanaǵa jetkizildi, jansaqtaý bólimine jatqyzyldy.

— Naýqastyń jaǵdaıy óte aýyr. Qazaqstan Respýblıkasy Densaýlyq saqtaý mınıstrliginiń hattamasyna sáıkes tolyq kólemde em qabyldap jatyr, — delingen habarlamada.

Eske salaıyq, buǵan deıin Almaty halyqaralyq áýejaıynda bir er adamnyń kassa janynda ózin órtemek bolǵanyn habarlaǵan edik. Polıtseıler der kezinde áreket etip, qaıǵyly jaǵdaıdyń aldyn aldy. Atalǵan fakti boıynsha qylmystyq is qozǵaldy.

Keıinirek bul oqıǵanyń Almaty halyqaralyq áýejaıy jumysyna áser etpegeni belgili boldy.