Almaty áýejaıynda naýqas balaǵa tıisti qyzmet kórsetpegen qyzmetkerden 5 mln teńge óndirildi

ALMATY. KAZINFORM – Almaty qalasynyń Túrksib aýdandyq sotynda halyqaralyq áýejaıynan moraldyq zııandy óteý týraly azamattyq is qaraldy.

Sottan atap ótkendeı, talap qoıýshy óziniń aryzynda áýejaı qyzmetkerleri ushaq Almaty qalasyna qonǵannan keıin, onyń 2019 jyly týǵan, naýqas balasyna múgedekter arbasyn usynǵanyn, alaıda, bul medıtsınalyq (dárigerlik) talaptarǵa sáıkes kelmeıtini týraly kórsetken.

– Sondaı-aq ishinde reanımatolog- dáriger men talap qoıýshynyń jubaıy bolǵan jeke reanımobıl kóligi áýejaı aýmaǵyna kirgizilmegen. Reanımobıldiń ornyna, ushaqtan termınalǵa deıin bala aýyr haldegi jolaýshylarǵa arnalmaǵan, tek múmkindigi shekteýli jolaýshylardy otyrǵyzý men túsirýge arnalǵan arnaıy tehnıka - ambýlıftpen jetkizilgen. Osylaısha, balany qaýipsiz ári medıtsınalyq (dárigerlik) talaptarǵa sáıkes tasymaldaý balaǵa qamtamasyz etilmegen, – dep habarlady sottan.

Neırohırýrgtyń qorytyndysyna sáıkes, bala qozǵala almaıtyn qalypta jáne jatqyzylǵan kúıde bolǵan, medıtsınalyq qujattyq baqylaýǵa sáıkes, naýqas dárigerdiń kómegimen júzege asyrylýy tıis.

«E» esimdi áýetasymaldaýshy, jolaýshynyń jaǵdaıyn bile tura, ári tasymaldaý shartynyń baryna qaramastan, reanımobıldi aımaqqa kirgizý qajettiligi týraly halyqaralyq áýejaı ákimshiligine habarlamaǵan. Bul aýrýdy tasymaldaý talaptarynyń buzylýyna jáne medıtsınalyq (dárigerlik) qyzmettiń tıisti deńgeıde kórsetilmeýine ákelip soqqan.

– Sot áýe kompanııasy men áýejaı qyzmetteri, sonyń ishinde shekaralyq jáne kedendik baqylaý arasynda tıisti úılestirýdiń bolmaýy balanyń densaýlyǵyna keri áserin tıgizýi múmkin ekenin atap ótti. ıAǵnı, shekaralyq baqylaýdan ótý kezinde keratıtpen aýyratyn balanyń kózine japsyrylǵan qorǵanysh tańǵyshtar ony sýretke túsirý úshin kúshtep alynǵan. Nátıjesinde, kelesi kúni bala ekijaqty pnevmotorakspen aýrýhanaǵa jatqyzylyp, aqpan aıynda kóz jumdy,– dep atap ótti sottyń baspasóz qyzmetinen.

Sot sheshimimen talap ishinara qanaǵattandyryldy, «E» áýe tasymaldaýshysynan talap qoıýshynyń paıdasyna moraldyq zııandy óteý úshin 5 mln teńge óndirildi.

Sot sheshimi zańdy kúshine engen joq.

Eske salaıyq, osyǵan deıin Delıden Almatyǵa aýyr halde kelgen jolaýshyǵa halyqaralyq áýejaıy jedel járdem qyzmetin jibermegeni týraly jazǵan edik.