Almaty áýejaıynda qyzdy kepilge alǵan kúdiktige qatysty sot bastalady

ALMATY. KAZINFORM - Sot Túrksib aýdanynda ótedi.

Almaty qalasy sotynyń málimetinshe, búgin shahardyń áýejaıynda qyzdy kepilgen alǵan kúdiktige qatysty sot bastalady.

Buǵan deıin Almaty áýejaıynda bolǵan oqıǵaǵa qatysty úsh qylmystyq is qozǵalǵanyn jazǵanbyz. 

Kepilge alý (QR QK-niń 261-baby 2-bóligi 4-tarmaǵy) — múlki tárkilenip, 7 jyldan 12 jylǵa deıingi merzimge bas bostandyǵynan aıyrý jazasy kózdelgen. Qarý qoldaný arqyly jasalǵan buzaqylyq (QR QK-niń 293-baby 3-bóligi) — 3 jyldan 7 jylǵa deıingi merzimge bas bostandyǵynan aıyrý jazasy qarastyrylǵan. Terrorızm aktisi týraly kórineý jalǵan habarlaý (QR QK-niń 273-baby) — 5 000 AEK mólsherinde aıyppul nemese 5 jylǵa deıin bas bostandyǵynan aıyrý.

Eske salaıyq, 7 naýryz kúni Almaty áýejaıynda er adam qyzdy kepilge alyp, kópshilik aldynda pyshaq kezengenin jazǵanbyz.

Musa Ábdiraıym kúdiktige ózin kepilge usynyp, qyzmetkerdiń ornyna turǵan. Er adam tártip saqshylarymen kelissózge alańdaǵan tusta ol kúdiktiniń qolyndaǵy pyshaqty julyp aldy. 

Memleket basshysynyń Jarlyǵymen qıyn-qystaý jaǵdaıda kórsetken erligi men janqııarlyǵy úshin Musa Saıranbaıuly Ábdiraıym «Erligi úshin» medalimen nagradtaldy. 

Keıin Kóliktegi polıtsııa departamenti Almaty áýejaıynda qyzdy kepilge alǵan er adamdy ustaýǵa qatysqan qyzmetkerler boıynsha túsinik berdi.