Almaty áýejaıynda kepilge alý isi: sot qaıta bastaldy
ALMATY. KAZINFORM – Almaty áýejaıynda adamdy kepilge alý isi boıynsha sot qaıta bastaldy.
Túrksib aýdandyq sotynda Mashrapbek Baratovqa qatysty qylmystyq isti qaraý qaıta bastaldy. Sotqa deıingi tergeýge qaıtarylǵan is búgin jalpy tártipte ótip jatyr. Sotqa sýdıa Anar Qarasheva tóraǵalyq etip otyr.
Qaıta tergeýdiń nátıjesi boıynsha qylmystyń saralanýy ózgerissiz qaldy. M.Baratovqa QR QK 293-baby 3-bóligi (buzaqylyq), 261-baby 2-bóligi 4-tarmaǵy (kepilge alý) jáne 273-baby (terrorızm aktisi týraly kórineý jalǵan habarlaý) boıynsha aıyp taǵyldy. Sonymen qatar sotqa deıingi tergeý barysynda Musa Ábdiraıym QR QPK-niń 71-babyna sáıkes jábirlenýshi dep tanyldy.
Sot barysynda kólik prokýratýrasynyń prokýrory Almas Bertaev aıyptaý aktisin oqydy. Іs materıaldaryna sáıkes, 2025 jyldyń 7 naýryzynda Mashrapbek Baratov jumyssyzdyq pen jınalyp qalǵan qaryzdaryna baılanysty qıyndyq kórip, Almaty halyqaralyq áýejaıyna avtobýspen kelgen. Áýejaı aýmaǵynda júrip, shamamen saǵat 11:00-de ǵımaratqa kirip, ekinshi qabatqa kóterilip, jolaýshylar tirkeletin zalǵa ótken.
Prokýrordyń aıtýynsha, baqylaý beketinde Baratovty tekserý qyzmetiniń ınspektory Botagóz Muhatyrova (jábirlenýshi) toqtatyp, ári qaraı ótý úshin otyrǵyzý talony men jeke kýáligin kórsetýdi suraǵan. Qujattarynyń joq ekenin bile tura, Baratov tekserý qyzmetiniń ınspektoryn kepilge alyp, ózin ushaqqa kirgizýge májbúrlemek bolǵan.
– Qoǵamdyq tártipti buzyp, jolaýshylar men basqa adamdardyń toqtatýǵa tyrysqanyna qaramastan, tekserý qyzmetiniń ınspektory Muhatyrovany ustap, onyń shashynan tartqan. Oń qaltasynan pyshaq alyp, qoǵamǵa ashyq túrde qurmetsizdik kórsetip, pyshaq qoldanamyn dep qorqytyp, Muhatyrovamen birge ushý aımaǵyna qaraı jyljı bastaǵan, – dedi Almas Bertaev.
Baratov kepilge alynǵan adamdy «tiri qalqan» retinde paıdalanýǵa bolatynyn túsinip, pyshaqty onyń moınyna taqap, talap qoıa bastaǵan: ózine jaqyndamaýdy, kúsh qoldanbaýdy jáne qarýdy tastaýdy talap etken. Eger bul talaptar oryndalmasa, áýejaı ǵımaratyn jaryp jiberemin dep qorqytqan. Sottalýshy toqtatýǵa Musa Ábdiraıym jáne áýejaı qyzmetkerleri kómektesken.
Eske salaıyq, bıyl 7 sáýir kúni Túrksib aýdandyq sotynda Almaty áýejaıynda qyzmetkerdi kepilge alǵan Mashrapbek Baratovqa qatysty sot otyrysy bastaldy.
Sottalýshy QK-niń 261-babynyń 2-bóliginiń 4-tarmaǵymen taǵylǵan aıyp boıynsha kinásin moıyndamady. Sondyqtan Túrksib aýdandyq soty kúdiktige qatysty sotqa deıingi jedeldetilgen is júrgizý isin jalpy tártipte sotqa deıingi tergep-tekserý úshin prokýrorǵa qaıtardy.
Aıta keteıik, 7 naýryz kúni Almaty áýejaıynda er adam qyzdy kepilge alyp, kópshilik aldynda pyshaq kezendi.
Musa Ábdiraıym kúdiktige ózin kepilge usynyp, qyzmetkerdiń ornyna turǵan. Er adam tártip saqshylarymen kelissózge alańdaǵan tusta ol kúdiktiniń qolyndaǵy pyshaqty julyp aldy.