Almaty áýejaıynda qaýipti zııankester anyqtalǵan ónimder elge kirgizilmedi
ASTANA. KAZINFORM — Almaty halyqaralyq áýejaıyndaǵy fıtosanıtarııalyq baqylaý beketinde qaýipti karantındik zııankestermen zalaldanǵan ımporttyq ónimderdiń Qazaqstan aýmaǵyna kirgizilýine jol berilmedi.
Aýyl sharýashylyǵy mınıstrligi Agroónerkásiptik keshendegi memlekettik ınspektsııa komıtetiniń málimetinshe, memlekettik ınspektorlar tekserý barysynda Nıderland Koroldiginen jetkizilgen salat kókteri partııasynan jáne Armenııa Respýblıkasynan ákelingen 600 dana kesilgen gúlden batys gúl trıpsin anyqtady.
— Atalǵan ónim ıelerine qatysty Qazaqstan Respýblıkasy Ákimshilik quqyq buzýshylyq týraly kodeksiniń 400-babynyń 2-bóligi («Qazaqstan Respýblıkasynyń ósimdikter karantıni salasyndaǵy zańnamasyn buzý») boıynsha ákimshilik is qozǵaldy. Materıaldar protsestik sheshim qabyldaý úshin sotqa joldandy, — delingen habarlamada.
Mınıstrlik memlekettik shekaradaǵy ótkizý beketterinde fıtosanıtarııalyq baqylaý kúsheıtilgenin atap ótti. Qabyldanyp jatqan sharalar asa qaýipti karantındik obektilerdiń el aýmaǵyna enýi men taralýynyń aldyn alýǵa, otandyq agroónerkásiptik keshendi qorǵaýǵa jáne Qazaqstannyń fıtosanıtarııalyq qaýipsizdigin qamtamasyz etýge baǵyttalǵan.
Eske salaıyq, buǵan deıin Almatyda quny 5 mln teńgeden asatyn zańsyz tańbalanǵan ónim tárkilengenin jazǵanbyz.
